Qazaqstandyq daryndy oqýshy álemniń úzdik 25 ýnıversıtetiniń birine tústi
ASTANA. KAZINFORM – Respýblıkalyq fızıka-matematıka mektebiniń (RFMM) oqýshysy Andreı Repalov álemniń jetekshi joǵary oqý oryndarynyń biri — AQSh-taǵy Duke University ýnıversıtetinen shaqyrtý aldy.
Atalǵan oqý orny álemdik reıtıngte úzdik 25 ýnıversıtettiń, al AQSh boıynsha úzdik 7 joǵary oqý ornynyń qataryna kiredi.
Andreı Repalov — RFMM-niń úzdik oqýshylarynyń biri. Ol akademııalyq, ınjenerlik jáne jobalyq qyzmet baǵyttarynda joǵary nátıjeler kórsetip keledi.
Andreı — «Mektep maqtanyshy» ataǵynyń úsh dúrkin ıegeri, FIRST Tech Challenge halyqaralyq robototehnıka jarysynyń jeńimpazy jáne júldegeri. Atalǵan dodada Qazaqstan tarıhynda alǵash ret altyn medal jeńip aldy. Sonymen birge NASA jáne Samsung halyqaralyq jobalarynyń fınalısi ári jeńimpazy.
Qoǵamdyq qyzmette Andreı Ashyq Jurek volonterlik uıymynyń mekteptegi fılıalyn qurdy. 2023 jyly Oqý-aǵartý mınıstrligi men USTEM Foundation qorynyń birlesken «Jyl volontery» ataǵyna ıe boldy. Sondaı-aq ol Qazaqstandaǵy AQSh Elshiligi tarapynan marapattalǵan alǵashqy volonterlerdiń biri.
Qazaqstan Respýblıkasy Oqý-aǵartý mınıstrligi daryndy jastardy qoldaýdy júıeli túrde júzege asyryp, oqýshylardyń akademııalyq jáne kásibı áleýetin damytýǵa, sondaı-aq olardyń halyqaralyq deńgeıde básekege qabiletti bolýyna jaǵdaı jasaýda.
Aıta ketelik 2026 jyldyń 10 mamyrynda bastalǵan negizgi UBT 139 myńǵa jýyq ret tapsyryldy. Talapkerlerdiń 71%-y testileýdi qazaq tilinde, 29%-y orys tilinde jáne 259 ret aǵylshyn tilinde tapsyrdy.
