Qazaqstandyq dárigerler Qyrǵyzstanda áli dúnıege kelmegen eki balaǵa kúrdeli emshara jasady
ASTANA. KAZINFORM – Qazaqstandyq dárigerler Qyrǵyzstanda eki kúrdeli jatyrishilik emshara júrgizip, qyrǵyzstandyq akýsher-gınekologtarmen tájirıbe almasty, dep habarlaıdy Densaýlyq saqtaý mınıstrligi.
Medıtsınalyq emsharalar Qazaqstan medıtsınasy kúnderi aıasynda Bishkek qalasyndaǵy Ana men bala densaýlyǵyn saqtaý ulttyq ortalyǵynyń bazasynda jasaldy.
Astanadaǵy UMC Ana men bala ortalyǵynyń «Uryq medıtsınasy» baǵdarlamasynyń jetekshisi, akýsher-gınekolog Gúlmıra Maǵzumovanyń jetekshiligimen qazaqstandyq mamandar áli dúnıege kelmegen eki balaǵa jatyrishilik qan quıý emsharasyn júrgizdi.
Jatyrishilik qan quıý – uryqtyń aýyr anemııasy kezinde qoldanylatyn joǵary tehnologııalyq medıtsınalyq emshara. Mundaı jaǵdaı ana men uryq arasyndaǵy rezýs-qaıshylyq kezinde týyndaýy múmkin. Bul kezde ana aǵzasynda túzilgen antıdeneler balanyń erıtrotsıtterine áser etedi. Zamanaýı medıtsınalyq tehnologııalar qajetti kómekti júktilik kezinde-aq kórsetýge múmkindik beredi.
– Biz úshin Qazaqstanda zamanaýı tehnologııalardy qoldaný ǵana emes, jınaqtalǵan klınıkalyq tájirıbemizben áriptesterimizben bólisý de mańyzdy. Mundaı birlesken sheberlik sabaqtary elderimiz arasyndaǵy kásibı baılanysty nyǵaıtyp, ana men balanyń densaýlyǵy úshin mamandardyń praktıkalyq bilim almasýyna múmkindik beredi, – dedi Gúlmıra Maǵzumova.
Qazaqstan medıtsınasy kúnderi aıasynda otandyq dárigerler Qyrǵyzstanda konsýltatsııalar ótkizip, patsıentterdi qabyldap jatyr. Sonymen qatar qyrǵyzstandyq áriptesterimen tájirıbe almasyp, Qazaqstan medıtsınasynda qoldanylatyn zamanaýı tásilderdi tanystyrýda.
Aıta keteıik, SQO-daǵy aýdandyq aýrýhanada kúrdeli kardıologııalyq otalar jasalady.
