Qazaqstandyq dárigerler Aýǵanstandaǵy mıssııadan oraldy
ASTANA. KAZINFORM — Magnıtýdasy 6,3 jer silkinisinen keıin Prezıdent Qasym-Jomart Toqaevtyń tapsyrmasymen Aýǵanstanǵa jiberilgen qazaqstandyq medıtsınalyq brıgada elge oraldy.
Elge keri oralǵan aq halattylardy kópshilik Astana áýjaıynda saltanatpen qarsy aldy.
— Biz úsh ulttyq ortalyqtan barǵan toppyz. Jergilikti aýrýhanalarda qarapaıym qan toqtatatyn dáriler, tańǵysh materıaldar men apparattardyń joqtyń qasy. Soǵan qaramastan 40-tan astam operatsııa jasadyq. Elızarov apparatyn ózimizben apardyq, sol qurylǵynyń kómegimen kóptegen kúrdeli synyqtardy emdedik. Naýqastardyń basym bóligi — jer silkinisi saldarynan aýyr jaraqat alǵandar, kópjaraqatpen túskender jáne synyqtary bar patsıentter, — dedi neırohırýrg dáriger Oljas Bekarysov.
Mıssııa barysynda dárigerler Qazaqstannyń elshiligimen birge Pákistan men Irannan qaıtarylǵan aýǵan otbasylary ornalasqan bosqyndar lagerine de bardy. Bul — atalǵan aımaqqa barǵan alǵashqy sheteldik delegatsııa. Lagerde medıtsınalyq kómekke muqtaj júzdegen adam bar. Qazaqstannan jiberilgen gýmanıtarlyq kómektiń negizgi bóligi dál osy lagerlerge jetkizilgen.
Syrtqy ister mınıstrliginiń erekshe tapsyrmalar jónindegi elshisi Erkin Tuqymov Qazaqstannyń bul baǵyttaǵy qoldaýy jalǵasatynyn aıtty.
— Biz búgin naǵyz batyrlardy qarsy aldyq. Bul joly qaýipsizdikke baılanysty tek er dárigerler jiberildi. Qazaqstannyń Aýǵanstanǵa júıeli, tolyqtaı qaıtarymsyz gýmanıtarlyq qoldaý kórsetti. Óıtkeni qaýipsiz Aýǵanstan — qaýipsiz Qazaqstan, — dedi ol.
Aıta keteıik, buǵan deıin Qazaqstan Aýǵanstanǵa gýmanıtarlyq júk jibergenin jazǵan edik.