Qazaqstandyq dárigerler Aýǵanstanda ondaǵan kúrdeli operatsııa jasady
ASTANA.KAZINFORM — Qazaqstandyq dárigerler Aýǵanstandaǵy gýmanıtarlyq medıtsınalyq mıssııa sheńberinde jumysyn jalǵastyryp jatyr.
Qazaqstandyq dárigerler toby Aýǵanstanda jumysyn jalǵastyryp, halyqqa praktıkalyq medıtsınalyq kómek kórsetýde jáne jergilikti mamandarmen óz tájirıbesin bólisýde. Kópbeıindi medıtsınalyq mıssııanyń quramyna elimizdiń travmatologııa, ortopedııa, kardıologııa, pedıatrııa, hırýrgııa, ýrologııa, pýlmonologııa jáne epıdemıologııa salalaryndaǵy jetekshi mamandary kirdi.
Medıtsınalyq toptyń jetekshisi bolyp akademık N. J. Batpenov atyndaǵy Ulttyq ǵylymı travmatologııa jáne ortopedııa ortalyǵy dırektorynyń orynbasary Serik Balǵazarov taǵaıyndaldy. Sonymen qatar mıssııanyń quramynda travmatolog-ortoped dárigerler Rýslan Ábilov, Alekseı Dolgov jáne Nurlan Avǵanov, gıgıenıst-epıdemıolog dáriger Ǵazız Nadýev, kardıolog Erik Otarbaev, pedıatr-pýlmonolog Abylaı Arystanálıev, balalar hırýrgi-endoskopıst Nyshanbek Shılanbaev, ýrolog Rýstam Sálimov jáne hırýrg Serik Nurtazın qyzmette.
Qazaqstandyq mamandardyń jumysy Aýǵanstandaǵy medıtsınalyq mekemelerdiń biriniń bazasynda uıymdastyrylǵan. Halyqqa konsýltatsııalyq kómek kórsetýmen qatar dárigerler aýǵan áriptesterimen birlesken tekserýler júrgizip, konsılıýmdarǵa qatysady, kúrdeli klınıkalyq jaǵdaılardy talqylap, patsıentterdi odan ári emdeý taktıkasyn aıqyndaıdy.
Tirek-qımyl apparatynyń aýyr jaraqat saldarlary men týa bitken deformatsııalary bar patsıentterge erekshe nazar aýdarylýda. Travmatolog-ortoped dárigerler kún saıyn 40-qa deıin patsıentke konsýltatsııa ótkizip, olardyń arasynan hırýrgııalyq emdeýdi qajet etetin eń kúrdeli jaǵdaılardy irikteıdi. Qazaqstandyq mamandar kún saıyn úsh-tórt rekonstrýktıvtik-qalpyna keltirý operatsııasyn jasap, patsıentterdiń joǵaltqan fýnktsııalaryn qalpyna keltirýge jáne ómir sapasyn edáýir jaqsartýǵa múmkindik berýde.
Aýǵanstandaǵy Qazaqstan medıtsınasy kúnderi sheńberinde otandyq travmatolog-ortopedter aýǵan tarabyna Ilızarov apparatynyń jıyntyqtaryn tabystady. Bul — kúrdeli synyqtardy emdeýde, aıaq-qol deformatsııalaryn túzetýde jáne súıek kemistikterin almastyrýda keńinen qoldanylatyn biregeı júıe. Atalǵan jabdyqty berý jergilikti mamandardyń joǵary tehnologııalyq medıtsınalyq kómek kórsetý múmkindikterin keńeıtip, densaýlyq saqtaý salasyndaǵy halyqaralyq gýmanıtarlyq yntymaqtastyqty damytýǵa Qazaqstannyń qosymsha úlesi bolmaq.
Qazaqstandyq dárigerler Aýǵanstan halqyna alǵash ret kómek kórsetip otyrmaǵanvn aıta ketý kerek. Ótken jyldyń qarasha aıynda bolǵan joıqyn jer silkinisinen keıin Qazaqstannan medıtsınalyq top jiberilgen bolatyn. Sol kezde otandyq mamandar on kúnniń ishinde 44 operatsııa jasap, 100-den astam patsıentke medıtsınalyq kómek kórsetti.
Anyqtama: medıtsınalyq mıssııa Qazaqstan Respýblıkasynyń gýmanıtarlyq bastamasy sheńberinde júzege asyrylýda. Qazaqstan delegatsııasynyń quramymen birge Aýǵanstanǵa jalpy kólemi 318,8 tonna gýmanıtarlyq kómek jetkizildi.
Aıta ketelik Gabon men Vetnamǵa baryp kelgen almatylyqtardan bezgek aýrýy anyqtalǵan edi.
