Qazaqstandyq bitimgerlik kontıngentiniń komandıri: Bári jospar boıynsha iske asyrylyp jatyr
ASTANA. KAZINFORM – Qarýly kúshterdiń áskerı qyzmetshileri Qazaqstan aýmaǵynan Sırııa astanasy Damaskige ushyp baryp, Faýar bitimgerlik bazasyna deıin avtokólikpen jetti, dep habarlaıdy Qorǵanys mınıstrliginiń baspasóz qyzmeti.
Bazanyń ornalasqan jerine qarsy taraptar arasynda atysty toqtatý rejımin saqtaý jónindegi mindetterdi oryndaýǵa arnalǵan áskerı tehnıka men múlik te jetkizildi. Qazaqstandyq jasaqtyń quramynda 139 áskerı qyzmetshi bar.
Ulttyq kontıngenttiń jeke quramy bazaǵa ornalasyp, jaıǵasyp jatyr. Rota shtaby isterdi qabyldaý jáne «BUU-nyń bólingen aýmaqty baqylaý jónindegi kúshteri» mıssııasy qolbasshysynyń rezervtik rotasynyń fýnktsıonalyn naqtylaý jumysyna kirisedi.
– Bári jospar boıynsha iske asyrylyp jatyr. Jeksenbi kúni bitimgerlerge júktelgen mindetterdi zerdeleý boıynsha jeke qurammen sabaqtar ótkizemiz, al dúısenbide olardy is júzinde pysyqtaýdy bastaımyz, – dedi qazaqstandyq bitimgerlik kontıngentiniń komandıri, podpolkovnık Jiger Aıpov.
Bitimgerlik mıssııalarǵa qatysý áskerı qyzmetshilerdiń jaýyngerlik daǵdylaryn arttyrýǵa yqpal etetin oqytýdyń mańyzdy quramdas bóligi. Bul mıssııanyń ereksheligi óz qyzmetimizdi jeke atqarýda bolyp otyr. Buryn bizdiń bitimgerlik kontıngent basqa elderdiń bólimsheleriniń quramynda qyzmet etken bolatyn.
Bólimshe jaýapkershilik aımaqtaryn patrýldeý, tosqaýyl beketterdi uıymdastyrý, bitimgerlik bazany kúzetý jáne beıbitshilik ýaǵdalastyqtarynyń saqtalýyn qamtamasyz etý úshin qajetti saýytty dóńgelekti mashınalarmen, kamazdarmen, shaǵyn avtobýstarmen jáne jol talǵamaıtyn kóliktermen jabdyqtalǵan.
BUU Taıaý Shyǵystaǵy táýelsiz mıssııasyn oryndaý úshin Qazaqstannan attanǵan áskerıler Sırııaǵa aman-esen jetkenin jazǵan bolatynbyz.
14 naýryzda 139 adamnan turatyn alǵashqy eshelondy Almatydan saltanatty túrde shyǵaryp salǵan edi.
