Kýba EAEO-ǵa medıtsına, energetıka jáne logıstıka salalarynda yntymaqtastyqty nyǵaıtýdy usyndy
ASTANA. KAZINFORM – Kýba Vıtse-prezıdenti Salvador Valdes Mesa Joǵary Eýrazııalyq ekonomıkalyq keńestiń keńeıtilgen qurammen otyrysynda Marıel arnaıy damý aımaǵyn EAEO-men logıstıkalyq jáne saýda yntymaqtastyǵyn keńeıtýge qoldanýdy usyndy.
Onyń sózinshe, V Eýrazııalyq ekonomıkalyq forýmnyń alǵashqy kúni Kýba men Eýrazııalyq ekonomıkalyq komıssııa yntymaqtastyqtyń 2026–2030 jyldarǵa arnalǵan birlesken josparyna qol qoıdy.
– Bul qujat yntymaqtastyqty nyǵaıtady. Naqty jáne ekijaqty jobalardy birlesip júzege asyrý arqyly saýda-ekonomıkalyq qatynastarymyzdy damytamyz, – dedi Kýba Vıtse-prezıdenti.
Sonymen birge, ol EAEO elderiniń taýarlary men qyzmetteri Kýba naryǵyna enýi úshin jaǵdaı jasaýǵa daıyn ekenin málimdedi. Odan bólek, eýrazııalyq ınvestorlar men qarjy ınstıtýttaryn Kýbada strategııalyq mańyzdy salalarda jobalardy júzege asyrýǵa shaqyrdy.
Salvador Valdes Mesanyń aıtýynsha, Kýba halyqaralyq medıtsınalyq yntymaqtastyqtaǵy tájirıbesin jáne bıofarmatsevtıkadaǵy zertteýler nátıjelerin bólisýge ázir.
Ol Marıel arnaıy damý aımaǵyn qoldanýdy usyndy. Bul alań EAEO jáne Latyn Amerıkasy men Karıb basseıni elderi arasyndaǵy logıstıkalyq, saýda baılanystaryn kúsheıtýge septigin tıgize alady.
– Kýbada densaýlyq saqtaý, azyq-túlik jáne energetıkalyq qaýipsizdik, jańartylatyn enegrııa kózderi, bıofarmatsevtıka, hımııa óndirisi, medıtsınalyq týrızm sektorlarynda EAEO-ǵa jaqsy jaǵdaı bar, – dedi Vıtse-prezıdent.
Al EAEO tarapynan Kýbanyń tsıfrlandyrý, JI jáne elektrondy saýda salalarynda úırenýge qyzyǵýshylyǵy bar. Sonymen qatar birlesken ınvestıtsııalyq jobalardy iske asyrýǵa yntaly.
Aıta keteıik, buǵan deıin EAEO elderi jasandy ıntellektini jaýapkershilikpen damytý týraly birlesken málimdeme qabyldaǵanyn jazǵanbyz.
