Qazaqstandyq bitimgerlerdi qarjylandyrý naýryz aıynda naqtylanady
ASTANA. KAZINFORM – Senat depýtaty Andreı Lýkın BUU mıssııalaryna jiberiletin áskerı qyzmetshilerdiń mindetine qatysty túsinik berdi.
«Birinshiden, Qazaqstan BUU-nyń múshesi bolǵandyqtan, osyndaı is-qımyldar múshe memlekettiń jaýapkershiligine jatady. Ekinshiden, osy qadam Qazaqstannyń bitimger saıasatyn qoldaıtynyn baıqatyp otyr. Sondyqtan halyqaralyq arenada osy saıasatymyzdy ustanatyn el retinde bitimgerlik mıssııalarǵa qatysyp jatyrmyz. Bizdiń áskerıler patrýlge shyǵady, beıbitshilik pen qaýipsizdikti saqtaý mıssııasyn oryndaıdy. Erekshe jaǵdaılarda jaýyngerlik kúsh pen quraldardy qoldanýy múmkin, ıaǵnı biz muny joqqa shyǵara almaımyz. Bul rette, sol aýmaqqa Qarýly Kúshterdiń daıyndyqtan ótken qyzmetshileri baǵyttalady», - dedi A. Lýkın Parlament palatalarynyń birlesken otyrysynan keıin tilshiler suraǵyna jaýap bere otyryp.
Onyń aıtýynsha, BUU mıssııasy aıasynda baratyn qazaqstandyq áskerıler dalalyq gospıtaldardy ornalastyrady. Osy oraıda túrli kásiptik baǵyttaǵy áskerı dárigerler, ınjenerlik-saperlik bólimsheler qyzmet etedi. Saperler jarylǵysh zattardy taýyp, aýmaqty tazartady. Sonymen qatar, áskerı polıtsııa bólimsheleri patrýlge shyǵady.
Senatordyń sózine qaraǵanda, aldaǵy ýaqytta jiberiletin kontıngentti qarjylandyrýdyń tolyq somasy bıyl naýryz aıynda naqtylanady.
Budan buryn habarlanǵandaı, búgin Parlament qazaqstandyq áskerılerdiń BUU mıssııalaryna qatysýy týraly Joldaýyn maquldady.
BUU shaqyrýy boıynsha óziniń áskerı tehnıkasymen, qarý-jaraǵymen jáne múlkimen rezerv rotasy retinde 139 áskerı qyzmetshi sanyndaǵy alǵashqy derbes ulttyq bitimgershilik kontıngentin «BUU-nyń Golan jotalaryndaǵy bólinýdi baqylaý jónindegi kúshteri» mıssııasyna (UNDOF, Sırııa-Izraıl) ornalastyrý 2024 jylǵy naýryzdan bastap josparlanyp otyr.
