Qazaqstandyq bitimgerler Sırııadan elge oraldy
ASTANA. KAZINFORM – Áskerı qyzmetkerlerdi elorda áýejaıynan Qorǵanys mınıstri Rýslan Jaqsylyqov bastaǵan qarýly kúsh quramy saltanatty túrde qarsy aldy.
— Búgin Otan aldyndaǵy boryshyn oryndap elge oralǵan sarbazdardy qarsy aldyq. Bitimgerler adal da eren eńbegimen jaqyn týysynyń ǵana emes barsha halyqtyń maqtanyshy. Sizderdi bir jyl buryn Bas qolbasshynyń komandalyq tapsyrmasymen bitimgerlik mıssııany oryndaýǵa jiberdik. Qoıylǵan mindetti múltiksiz oryndap elge oraldyńyzdar, áskerı mindetti berik bolǵan sizderde alǵys aıtamyn, — dedi Qorǵanys mınıstri Rýslan Jaqsylyqov bitimgerlerdi qarsy ala turyp.
Sondaı-aq mınıstr bitimgerlik mıssııanyń alasapyran aımaqta halyqaralyq beıbitshilik pen turaqtylyqty saqtaý jolyndaǵy mańyzdy mindet bolǵanyn aıtty.
— Sizderdiń kúsh-jigerlerińiz nazardan tys qalmaı, halyqaralyq arenada Qazaqstannyń bedelin jaýapty, ári beıbit memleket retinde odan ári nyǵaıtýǵa negiz boldy. Adal qyzmetterińiz ben jaýyngerlik tapsyrmany oryndaýdaǵy jaýapkershilikterińiz, sondaı-aq, qazirgi tańda basynan qıyn kezeńdi ótkerip jatqan adamdarǵa kómek qolyn sozǵandaryńyz úshin alǵys bildiremin, - deıdi R. Jaqsylyqov.
Eske salsaq, 2024 jyly naýryzda Qazaqstannyń alǵashqy ulttyq bitimgerlik kontıngenti (139 áskerı qyzmetker) BUU mıssııasy aıasynda Golan jotalaryna jiberildi.
Áskerı qyzmetshiler mobıldi patrýldeý, baqylaý beketterin kúsheıtý, evakýatsııa jáne mınasyzdandyrý jumystaryn oryndady.
Aıta keteıik, Birikken Ulttar Uıymy kúshteriniń bólinýdi baqylaý mıssııasynyń qolbasshylyǵy (SOONNR — UNDOF) Golan bıiktikterinde QR Qarýly Kúshteriniń ulttyq bitimgershilik kontıngentin jetkizý jáne ornalastyrý qyzmetin joǵary baǵalady.
Bıyl aqpanda Senat Qazaqstannyń bitimgerlerine arnalǵan ótemaqyǵa qatysty zańdy maquldady.
Sondaı-aq birer kún buryn Qazaqstan bitimgerleriniń ekinshi quramy Golan jotalaryna attandy.