Qazaqstandyq bitimgerler Sırııada qandaı mindetti oryndap keldi
ASTANA. KAZINFORM – Búgin Sırııada bir jyl boıy bitimger mindetin atqarǵan bir top áskerı qyzmetker elge oraldy.
— BUU mıssııasynyń maqsaty — qaqtyǵysýshy taraptar arasyndaǵy atysty toqtatý jáne beıbitshilikti ornatý. Bizdiń mindet — BUU Jarǵysynyń 6-paragrafyna sáıkes, Golan jotalaryna Sırııa Arab Respýblıkasy men Izraıl arasyndaǵy beıbitshilikti saqtaý. Qazaqstan tarapynan 139 adam jiberildi. Búgin elge 99 áskerı qyzmetshiler oraldy, qalǵan quram bir aptaǵa qalyp, mindetti qabyldap-tapsyrý sharalarynan keıin keledi, - dedi birinshi ulttyq kontıngenttiń komandıri — podpolkovnık Jiger Aıypov BAQ ókilderiniń saýalyna jaýap bere turyp.
Onyń aıtýynsha, qazaqstandyq bitimgerlerdiń negizgi mindeti — bitim týraly kelisimniń oryndalýyn baqylaý.
— Bizdiń kontıngent mıssııa komandıriniń rezervi retinde áreket etti. Basty mindet — jedel áreket etetin top retinde kez kelgen tapsyrmany táýlik boıy (24/7) oryndaýǵa daıyn bolý. Qyzmetti negizinen eki top atqardy, al jeke quram turaqty jaýyngerlik daıyndyqta boldy. Sonymen qatar bizge qosymsha mindetter júkteldi, ıaǵnı jaýapkershilik aımaǵynda patrýl júrgizý, gýmanıtarlyq júkter men BUU ókilderin aımaq ishinde jáne syrtynda alyp júrý, oq-dárilerdi izdeý jáne joıý sekildi, - deıdi ol.
Buǵan deıin habarlaǵanymyzdaı búgin qazaqstandyq bitimgerler Sırııadan elge oraldy.
2024 jyly naýryzda Qazaqstannyń alǵashqy ulttyq bitimgerlik kontıngenti (139 áskerı qyzmetker) BUU mıssııasy aıasynda Golan jotalaryna jiberilgen edi.