Qazaqstandyq bitimgerler Sırııa turǵyndaryna medıtsınalyq kómek kórsetti
ASTANA. KAZINFORM – BUU-nyń bólingen aımaqty baqylaý jónindegi kúshteri (UNDOF) quramynda qyzmet atqaryp júrgen qazaqstandyq bitimgerler Sırııanyń El-Kýneıtra provıntsııasyndaǵy Han-Arnaba qalasynyń turǵyndaryna gýmanıtarlyq medıtsınalyq kómek kórsetti.
Qorǵanys mınıstrliginiń málimetinshe, aktsııa BUU mıssııasynyń dalalyq gospıtaliniń medıtsına qyzmetkerleri jáne Sırııa Arab Respýblıkasynyń densaýlyq saqtaý salasynyń mamandarymen birlesip uıymdastyryldy.
Aktsııa barysynda dárigerler Han-Arnaba qalasynyń turǵyndaryn ambýlatorııalyq qabyldaýdan ótkizip, medıtsınalyq tekserý júrgizdi. Nátıjesinde turǵyndarǵa alǵashqy medıtsınalyq kómek kórsetilip, odan ári em qabyldaý boıynsha usynymdar berildi.
Balalarǵa, egde jastaǵy adamdarǵa jáne turaqty medıtsınalyq baqylaýdy qajet etetin azamattarǵa erekshe kóńil bólindi.
«Qazaqstandyq bitimgerlerdiń, BUU mıssııasynyń dalalyq gospıtali medıtsına qyzmetkerleriniń jáne sırııalyq mamandardyń birlesken jumysynyń nátıjesinde turǵyndar ýaqytyly ári bilikti medıtsınalyq kómek aldy. Han-Arnaba qalasynyń turǵyndary qazaqstandyq bitimgerler men medıtsına qyzmetkerlerine kásibıligi, qamqorlyǵy jáne janashyrlyǵy úshin alǵys bildirdi», – dep habarlady Qorǵanys mınıstrligi.
Vedomstvonyń málimetinshe, mundaı gýmanıtarlyq is-sharalar bitimgerler men jergilikti halyq arasyndaǵy ózara baılanysty nyǵaıtyp, BUU mıssııasynyń qyzmetine degen senimdi arttyrýǵa yqpal etedi.
Aıta keteıik, BUU mıssııasynyń qolbasshysy Golan jotalaryndaǵy qazaqstandyq bitimgerlermen kezdesti.
