Qazaqstandyq bitimgerler Lıvandaǵy BUU mıssııasynda qyzmet atqarýǵa attandy
ASTANA.KAZINFORM - Qazaqstan Qarýly Kúshteriniń 11 áskerı qyzmetshisi Birikken Ulttar Uıymynyń Lıvandaǵy ýaqytsha kúshteri (UNIFIL) mıssııasynyń quramynda bitimgerlik qyzmet atqarý úshin Lıvanǵa bardy. Olar Lıvannyń ońtústik bóliginde Úndistan áskerı kontıngentiniń quramynda qyzmet etetin bolady.
Qazaqstandyq bitimgerler BUU Qaýipsizdik Keńesiniń mandatyna sáıkes, atysty toqtatý rejımin qamtamasyz etý, jaýapkershilik aımaǵyndaǵy jaǵdaıdy baqylaýda ustaý, jergilikti bılik organdarymen jáne turǵyndarmen baılanys ornatý, gýmanıtarlyq is-sharalardy súıemeldeý, patrýldeý, BUU nysandaryn kúzetý jáne óńirdegi turaqtylyqty saqtaýǵa járdemdesý sekildi mindetterdi oryndaıdy.
Qorǵanys mınıstrligi málimetinshe, barlyq áskerı qyzmetshiler BUU Qaýipsizdik Keńesiniń rezolıýtsııasyna sáıkes halyqaralyq standarttar boıynsha jan-jaqty daıyndyqtan ótti. Onyń aıasynda halyqaralyq gýmanıtarlyq quqyq normalary, kúsh qoldaný erejeleri, beıbit turǵyndarmen qarym-qatynas jasaý erekshelikteri zerdelenip, tildik daıyndyq júrgizildi.
Sondaı-aq qazirgi zamanǵy bitimgerlik operatsııalar jaǵdaıyndaǵy is-qımyldar boıynsha praktıkalyq jattyǵýlar uıymdastyryldy.
Qazaqstandyq áskerı qyzmetshilerdiń Lıvandaǵy bitimgerlik mıssııasyndaǵy tájirıbesi mol. Búgingi kúni jaýapkershilik aımaǵyna ulttyq kontıngenttiń 11-shi quramy jiberilip otyr.
Buǵan deıin de qazaqstandyq bitimgerler UNIFIL mıssııasyndaǵy úndi kontıngentiniń quramynda mindetterin sátti atqarǵan bolatyn. Qyzmet barysynda olar joǵary kásibı daıyndyǵyn, temirdeı tártibin jáne kópultty ortada tapsyrmalardy oryndaýǵa ázirligin kórsetip, mıssııa qolbasshylyǵy men halyqaralyq seriktester tarapynan joǵary baǵa alǵan.
Qazaqstannyń BUU bitimgerlik operatsııalaryna qatysýy – elimizdiń halyqaralyq qaýipsizdikti qamtamasyz etý baǵytyndaǵy yntymaqtastyǵynyń mańyzdy bóligi. Bul qadam Qazaqstannyń jahandyq beıbitshilikti saqtaý jolyndaǵy jaýapty memleket retindegi bedelin arttyrýǵa septigin tıgizedi. Sondaı-aq áskerı qyzmetshilerdiń kópultty kontıngentter quramynda qyzmet etip, biregeı is-tájirıbe jınaqtaýyna jol ashady.
Qazaqstandyq bitimgerler Sırııa turǵyndaryna medıtsınalyq kómek kórsetkenin jazǵan edik.
