Qazaqstandyq bitimgerler Golan jotalarynda tórt aıda 470 jedel is-shara ótkizdi
ASTANA. KAZINFORM – Qazaqstandyq bitimgerler BUU-nyń Golan jotalaryndaǵy bólinýdi baqylaý jónindegi mıssııasy quramynda tórt aıda 470 jedel is-shara ótkizdi, dep habarlaıdy Qorǵanys mınıstrligi.
19 qyrkúıekte Qazaqstannyń úshinshi ulttyq bitimgerlik kontıngentiniń atalǵan mıssııa quramynda qyzmet atqara bastaǵanyna tórt aı toldy.
Osy ýaqyt ishinde áskerı qyzmetshiler jaýapkershilik aımaǵynda 379 ret patrýldeý júrgizdi. Sonymen qatar 49 ýaqytsha túngi baqylaý beketi uıymdastyrylyp, jedel áreket etý kúshteriniń 11 oqý-jattyǵýy ótti. Jergilikti qaýymdastyq ókilderimen de 11 kezdesý uıymdastyryldy.
– BUU mıssııasynyń mandatyna sáıkes bitimgerlik rotanyń áskerı qyzmetshileri jaýapkershilik aımaǵyn patrýldep, ahýaldy baqylaýdy júzege asyrady, sondaı-aq jedel áreket etý kúshteriniń turaqty ázirligin qamtamasyz etedi, – delingen mınıstrlik habarlamasynda.
Qajet bolǵan jaǵdaıda qazaqstandyq bitimgerler baqylaý beketterin kúsheıtýge, BUU personalyn evakýatsııalaýǵa, sondaı-aq uıym ókilderi men júkterin alyp júrýge tartylady.
Ulttyq kontıngenttiń ınjenerlik-saperlik toby da arnaıy mindetterdi atqaryp jatyr. Tórt aı ishinde áskerı qyzmetshiler 350 jarylǵysh zat pen atys qarýyna arnalǵan 1 800 oq-dárini anyqtap, joıǵan.
Qazaqstandyq bitimgerlik kontıngent BUU mandatyna sáıkes Golan jotalaryndaǵy mindetterin oryndaýdy jalǵastyryp jatyr.
Aıta keteıik, shildede qazaqstandyq bitimgerler Lıvandaǵy BUU mıssııasynda qyzmet atqarýǵa attandy.
