Qazaqstandyq bitimgerler Golan jotalarynda Naýryzdy atap ótti
ASTANA. KAZINFORM — Qazaqstan Qarýly kúshteriniń áskerı qyzmetshileri Golan jotalarynda halyqaralyq mıssııaǵa qatysýshylar úshin mádenı-aǵartýshylyq is-shara uıymdastyrdy, dep habarlaıdy Qorǵanys mınıstrliginiń baspasóz qyzmeti.
139 adamnan turatyn qazaqstandyq bitimgerler BUU-nyń mıssııasy quramynda óz jaýapkershilik aımaǵynda turaqtylyq pen qaýipsizdikti qamtamasyz etý mindetterin atqaryp keledi.
— Naýryz meıramyn toılaý dostyq jáne ózara qurmet atmosferasynda ótti. Qazaqstandyq bitimgerler jańarý, ıgilik jáne jańa ómirlik kezeńniń bastalýyn beıneleıtin ulttyq dástúrler men ádet-ǵuryptardy tanystyrdy. Saltanatty is-sharaǵa Nepal, Úndistan, Ýrýgvaı elderiniń bitimgerlik kontıngentteri, BUU-nyń bólinýdi baqylaý jónindegi kúshteriniń (UNDOF) shtab ofıtserleri, BUU Baqylaý mıssııasynyń (UNTSO) áskerı baqylaýshylary shaqyryldy. Qonaqtar ulttyq taǵamdardan dám tatyp, merekelik baǵdarlamaǵa qatysty, — delingen habarlamada.
Іs-shara halyqaralyq ózara is-qımyldy nyǵaıtýǵa, mádenıetaralyq dıalogty damytýǵa jáne áskerı qyzmetshiler arasynda beıresmı qarym-qatynasty arttyrýǵa múmkindik berdi. Kópultty bitimgerlik mıssııa jaǵdaıynda Naýryzdy atap ótý qazaqstandyq áskerı qyzmetshilerdiń beıbitshilik, ózara túsinistik jáne mádenı ártúrlilikti qurmetteý qaǵıdattaryna adaldyǵyn kórsetti.
Buǵan deıin habarlanǵandaı, Beıjińdegi qazaqstandyq damý ortalyǵy Naýryzdy qalaı toılaǵany belgili boldy.