Qazaqstandyq bitimgerler Golan jotalarynda myńnan asa jarylǵysh zatty joıdy
ASTANA. KAZINFORM — BUU mıssııasy quramynda qyzmet etetin bólinýdi baqylaý jónindegi Qazaqstan kontıngentiniń ınjenerlik-saperlik toby aýmaqty qaýipti zattardan tazalaý boıynsha aýqymdy jumys júrgizip jatyr. Bul týraly Qorǵanys mınıstrligi málim etti.
— Osy jyldyń segiz aıynda bitimgerler 32 jedel tapsyrmany oryndap, myńnan astam qaýipti zatty, onyń ishinde 23 qoldan jasalǵan qurylǵyny taýyp, joıdy. Bul kórsetkish aldyńǵy rotatsııa jumysyna qaraǵanda eki ese artyq, — delingen habarlamada.
Vedomstvonyń málimetinshe, buǵan deıin 14 jedel tapsyrmany oryndaý barysynda saperler 500-den astam qaýipti zatty jáne 6 qoldan jasalǵan qurylǵyny joıǵan. Bul qazaqstandyq bitimgerler jumysy tıimdiliginiń artqanyn aıqyn kórsetedi.
Injenerlik-saperlik top komandıri maıor Ernar Amantaıulynyń aıtýynsha, jarylmaǵan oq-dárilerdiń kópshiligi eldi mekenderge jaqyn jerde tabylǵan jáne olar beıbit turǵyndardyń ómiri men densaýlyǵyna úlken qaýip tóndirgen.
— Qaýipti zattardyń ornalasqan jeri týraly aqparat BUU qyzmetkerlerinen, patrýl quramynan jáne keıde jergilikti turǵyndardan kelip túsedi, — dedi ol. — Habar túsken soń oqıǵa ornyna shyǵyp, baqylaý jasap, zattardy joıý kezinde týyndaıtyn yqtımal qaýipterdi baǵalaımyz. Barlyq is-qımyl ınfraqurylymǵa zııan keltirmeý maqsatynda júrgiziledi.
Saperlerge kóbinese artıllerııalyq jáne tank snarıadtarymen, tankige jáne jaıaý áskerge qarsy mınalarmen, drondardyń oqtumsyqtarymen, sondaı-aq qoldan jasalǵan jarylǵysh qurylǵylarmen jumys isteýge týra keledi. Bul zattardyń barlyǵy Sırııa aýmaǵyndaǵy qarýly qaqtyǵystardyń saldary, jáne mıssııanyń jaýapkershilik aımaǵynda olardyń sany áli de jetip artylady.
Degenmen, qazaqstandyq kontıngenttiń kásibı jumysy beıbit turǵyndarǵa tónetin qaýip deńgeıin aıtarlyqtaı tómendetip, BUU jaýapkershilik aımaǵynda qaýipsizdikti nyǵaıtýǵa yqpal etip keledi.
Eske sala keteıik, buǵan deıin BUU Lıvandaǵy bitimgerler sanyn qysqartýdy bastaǵanyn jazǵan edik.