Qazaqstandyq bitimgerler Golan bıiktikterindegi derbes mıssııaǵa kiristi
ASTANA. KAZINFORM – BUU mıssııasynyń jaýapkershilik aımaǵynda Golan bıiktiginde ornalasqan Faýar bitimgerlik bazasynda Qazaqstannyń bitimgerlik kontıngentine uıymnyń týyn tabystaýdyń saltanatty rásimi ótti.
Іs-sharaǵa «BUU-nyń bólinýdi baqylaý jónindegi kúshteri» mıssııasynyń basshysy general-leıtenant Kýrmal Nırmal jáne mıssııa quramyndaǵy bitimgerlik kontıngentterdiń basshylary qatysty.
– Mıssııa qolbasshysynyń rezervi bolý úlken mártebe. Sizderge kásibı biliktilik pen tıisti quzyrettilikti talap etetin eń jaýapty mindet júktelip otyr. Qazaqstandyq bólimshe de Irlandııanyń bitimgerlik kontıngenti sııaqty ózine júktelgen mıssııany laıyqty deńgeıde oryndaıtynyna senimdimin, - dep atap ótti general-leıtenant Kýrmal Nırmal qazaqstandyq áskerı qyzmetshilerge arnaǵan sózinde.
Irlandııalyq bólimsheniń basshysy podpolkovnık Olıver Klıar BUU Týyn Qazaqstan ulttyq kontıngentiniń komandıri podpolkovnık Jiger Aıpovqa saltanatty jaǵdaıda tapsyrdy.
– BUU týyn tapsyrǵan sátten bastap bizdiń bólimshe Golan bıiktikterindegi mıssııanyń tolyqqandy qatysýshysy boldy. Endi biz tapsyrma boıynsha júktelgen mindetterdi oryndaýǵa kirisemiz, - dep túsindirdi podpolkovnık Jiger Aıpov.
Bir jyl ishinde qazaqstandyq bitimgerlik kontıngent jergilikti jerdi patrýldeýmen, blokposttardy kúsheıtýmen jáne qarsylas taraptar arasyndaǵy atysty toqtatý rejımin qoldaýmen aınalysyp, BUU mıssııasynyń mandatyna sáıkes basqa da mindetterdi oryndaıtyn bolady.
