Qazaqstandyq bitimgerler BUU mıssııasyna tolyq daıyn
ASTANA. KAZINFORM - Qorǵanys mınıstriniń orynbasary general-maıor Asqar Mustabekov Almaty garnızonyna jumys sapary barysynda úshinshi ulttyq bitimgerlik kontıngenttiń BUU-nyń Golan jotalaryndaǵy mıssııasyn oryndaýǵa daıyndyq barysyn baǵalady.
QR Qorǵanys mınıstrligi Bitimgerlik operatsııalar ortalyǵynyń «Bitimger» oqý-jattyǵý ortalyǵynda mınıstrdiń orynbasaryna áskerı qyzmetshilerdi daıarlaýdyń tolyq tsıkli kórsetildi.
Baǵdarlama taktıkalyq, arnaıy, medıtsınalyq jáne tildik daıyndyqty, odan ózge halyqaralyq standarttarǵa sáıkes kópultty ortadaǵy is-áreketterdi oqytýdy qamtıdy.
Oqytý kezinde barynsha jaýapkershilikpen jumys isteýge jáne sheteldik kontıngenttermen ózara is-áreketke jiti nazar aýdarylady.
Sapar barysynda general-maıor Asqar Mustabekov ortalyqtyń oqý-materıaldyq bazasymen tanysyp, qyzmet kórsetý sharttary men oqý protsesin qalaı uıymdastyrylatynyn tekserdi.
Budan basqa oǵan bitimgerlerdiń zamanaýı jabdyqtary men BUU mıssııasyna jiberiletin jeke quramdy qamtamasyz etýdiń qoldanystaǵy normalary kórsetildi.
Sapar qorytyndysy boıynsha ol áskerı qyzmetshilerdi daıarlaý jáne sabaqtardy ótkizý sapasynyń deńgeıi joǵary dep atap ótti.
Sapar sońy úshinshi bitimgerlik kontıngenttiń jeke quramyn saltanatty sapqa turǵyzýmen aıaqtaldy.
Mınıstrdiń orynbasary áskerı qyzmetshilerge qyzmeti jáne halyqaralyq mindetterdi oryndaýǵa daıyndyǵy úshin alǵys aıtyp, Qazaqstannyń jahandyq qaýipsizdikti qoldaýǵa qosqan úlesiniń mańyzdylyǵyn atap ótti. Qorǵanys vedomstvosynyń atynan jeke quramǵa baǵaly syılyq tabys etildi.
BUU-nyń Golan jotalaryndaǵy bólingen aımaqty baqylaý mıssııasy 1974 jyldan beri iske asyrylyp keledi. Qazaqstan oǵan 2024 jyldan bastap derbes ulttyq kontıngent retinde qatysyp keledi.
Osyǵan deıin qazaqstandyq bitimgerlerdiń Golan jotalarynda ulttyq dástúrlerdi dáriptegeni týraly jazdyq.
