Qazaqstandyq bitimger BUU-nyń Dag Hammarsheld medalimen marapattalady
ASTANA. KAZINFORM – Qazaqstandyq bitimger, podpolkovnık Asqar Muhamedrysuly BUU-nyń Dag Hammarsheld medalimen qaıtys bolǵannan keıin marapattalady.
Marapattaý rásimi 5 maýsym kúni Birikken Ulttar Uıymy shtab-páterinde ótedi.
BUU málimetinshe, rásim barysynda Bas hatshy Antonıý Gýterrısh bitimgerlerdi eske alyp, qyzmettik mindetin oryndaý kezinde qaza tapqan áskerı, polıtsııa jáne azamattyq qyzmetkerlerge Dag Hammarsheld medalin tabystaıdy.
Olardyń qatarynda 2025 jyly Ońtústik Sýdandaǵy BUU mıssııasynda qaza tapqan qazaqstandyq podpolkovnık Asqar Muhamedrysuly da bar.
BUU dereginshe, búginde álemniń eń kúrdeli óńirlerinde 50 myńnan astam azamattyq, áskerı jáne polıtsııa bitimgeri qyzmet atqaryp júr.
Qazirgi ýaqytta 118 memleket BUU-nyń 11 bitimgershilik mıssııasyna áskerı jáne polıtsııa qyzmetkerlerin jibergen.
Qazaqstan BUU-nyń bitimgershilik qyzmetine alǵash ret 2014 jyly qatysa bastady.
Búginde Qazaqstan BUU bitimgershilik operatsııalaryna qatysýshy elder arasynda 51-orynda tur.
Qazirgi tańda Qazaqstan Ortalyq Afrıka Respýblıkasy, Kongo Demokratııalyq Respýblıkasy, Lıvan, Taıaý Shyǵys, Ońtústik Sýdan jáne Batys Sahara aýmaqtaryndaǵy mıssııalarǵa 153 áskerı jáne polıtsııa qyzmetkerin jibergen.
– Eshkim beıbitshilik jolynda qyzmet etip júrip qaza tappaýy tıis. Bitimgerlerge jasalǵan shabýyldar halyqaralyq gýmanıtarlyq quqyqtyń óreskel buzylýy bolyp tabylady, – dedi Antonıý Gýterrısh.
Sonymen qatar BUU Bas hatshysy qazirgi kezeńde bitimgershilik turaqtylyq pen úmitti saqtaýdyń tıimdi tetigi bolyp qala beretinin atap ótti.
– Shıelenister kúsheıgen zamanda bitimgershilik turaqtylyq pen úmitti qalpyna keltirýdiń tıimdi ári únemdi tásili bolyp qala beredi, – dedi ol.
Aıta keteıik, búgin qazaqstandyq bitimgerler Golan jotalaryna attandy.
