Qazaqstandyq boksshylar Nıderlandta ótetin halyqaralyq týrnırge qatysady

ASTANA. KAZINFORM — Nıderlandtyń Eındhoven qalasynda ótetin bokstan Eindhoven Cup halyqaralyq týrnırde baq synaıtyn qazaqstandyq boksshylar anyqtaldy.

Dúbirli dodaǵa elimizdiń atynan 10 boksshy baq synaıdy.

Olardyń qatarynda Danııal Sábıt (50 keli), Mahmud Sabyrhan (55 keli), Erhan Turdan (60 keli), Ertýǵan Zeınýllın (65 keli), Abylaıhan Júsipov (70 keli), Sabyrjan Aqqalyqov (75 keli), Erasyl Jaqpekov (80 keli), Dáýlet Tilemisov (85 keli), Saǵyndyq Toǵambaı (90 keli), Nurlan Saparbaı (90 keliden joǵary) bar. 

Halyqaralyq týrnır 6-9 maýsym aralyǵynda ótedi.

Eske salsaq, Astanada ótetin bokstan álem kýbogyna qatysatyn quramalar sany kóbeıip, qazir olardyń sany 33-ke jetti. Oǵan álemniń úzdik bylǵary qolǵap sheberleri qatysady dep josparlanyp otyr. El quramasy onda birinshi quramymen sharshy alańǵa shyǵady. Álem kýbogy elordadaǵy J.Úshkempirov atyndaǵy jekpe-jek saraıynda ótedi.

World Boxing týrnıri úsh kezeńnen turady. Alǵashqysy sáýir aıynda Brazılııanyń Fos-dý-Igýasý qalasynda boldy. Al úshinshi kezeń 21-27 shilde aralyǵynda ótedi. Ázirge onyń qaıda ótetini belgisiz.