Qazaqstandyq boksshylar Álem kýbogynan alty medal aldy

ASTANA. KAZINFORM - Brazılııanyń Fos-dý-Igýasý qalasynda World Boxing aıasynda ótken bokstan álem kýbogynda qazaqstandyq úsh boksshy chempıon atandy.

Aldymen el quramasynan Dáýlet Tólemisov (85 keli) ózbekstandyq Akmaljon Isroılovpen qolǵap túıistirdi. Jekpe-jek barysynda Dáýlettiń senimdiligi baıqalyp turdy. Nátıjesinde qarsylasyn qapy qaldyryp, jeńis tuǵyryna kóterildi.

Qazaqstandyq taǵy bir boksshy Nursultan Altynbek (55 keli) Mırazızbek Mırzahalılovtyń osal tusyn tapty. Álem kýbogyn irikteý kezeńinen bastaǵan ol eshqaısysynda irkilgen joq. Fınalda sol qarqynynan taıǵan joq. Osyndaı jigerli qımylymen chempıondyq ataqqa qol jetkizdi.

Al Jazıra Oraqbaevanyń (51 keli) fınaldaǵy qarsylasy - ıtalııalyq Elen Aııarı jekpe-jekke shyǵýdan bas tartty. Osylaısha Jazıra álem kýbogynda altyn medalǵa ıe boldy.

Al Uljan Sársenbek (57 keli), Dıas Moljigitov (75 keli), Danııal Saparbaı (90 keliden joǵary) qola júldeger atandy.

Sondaı-aq el quramasynan Nurzat Ońǵarov (50 keli), Talǵat Syrymbetov (60 keli), Anıta Ádisheva (54 keli), Almat Ábdýalı (65 keli), Darhan Dúısebaı (70 keli) jarys jolynan shyǵyp qaldy.

World Boxing týrnıri úsh kezeńnen turady. Ekinshi kezeń 30 maýsym - 7 shilde aralyǵynda Qazaqstanda bolady. Al úshinshi kezeń 21-27 shilde aralyǵynda ótedi. Biraq onyń ótetin orny ázirge belgisiz.