Qazaqstandyq boksshyǵa qyz zorlady degen aıyp taǵyldy
ASTANA. KAZINFORM – BAQ betteri men áleýmettik jelilerde tanymal boksshy Janqosh Turarov qyz zorlady degen aqparat tarady.
Almaty qalalyq polıtsııa departamenti agenttik tilshisiniń saýalyna oraı, qylmystyq is qozǵalǵanyn rastady. Biraq aıyptalýshynyń jeke basyna qatysty málimetti naqtylamady.
«Kelip túsken aryzǵa baılanysty Áýezov aýdandyq polıtsııa basqarmasy qylmystyq is qozǵady. Sot-medıtsınalyq saraptama taǵaıyndaldy. Qazir oqıǵanyń tolyq mán-jaıyn anyqtaý úshin tergeý júrip jatyr», - delingen vedomstvo usynǵan habarlamada.
Aıta keteıik, 33 jastaǵy Jańqosh Turarov - kásibı boksshy. 2023 jyldyń 21 naýryzynan bastap jartylaı orta salmaqtaǵy IBO bokstan álem chempıony.
28 qyrkúıekte Almatyda ótetin AllStarsBoxing keshinde Jańqosh Turarov IBO WORLD jáne WBA WORLD GOLD álem tıtýldaryn qorǵaıtyny josparlanǵan.
