Qazaqstandyq boksshy Tımýr Nurseıitov álem kýbogynyń shırek fınalyna shyqty
ASTANA. KAZINFORM - Qytaıdyń Gýııan qalasynda ótip jatqan álem kýbogynyń ekinshi kúni, 16 maýsymda qazaqstandyq Tımýr Nurseıitov (75 keli) jarysty jalǵastyrýǵa múmkindik aldy.
Otandasymyz 1/8 fınalda Irlandııa sportshysy Tadhg Odonellmen sheberlik baıqasty.
Qos boksshy da bir-biriniń shabýylyn kútip, aıqas 3 raýnd boıy ańdysýmen ótti. Nátıjesinde tóreshiler 3:2 esebimen jeńisti otandasymyzǵa berdi.
Aıta ketsek, budan buryn Sanatáli Tóltaev (65 keli) jarysty jalǵastyrýǵa múmkindik aldy .
Otandasymyz 1/16 fınalda ázerbaıjandyq Malık Hasanovty qapy qaldyrdy.
Endi el quramasynan taǵy 4 boksshy sharshy alańǵa shyǵady. Olardyń qatarynda Tımýr Qabdeshov (55 keli), Nazym Qyzaıbaı (54 keli, Laýra Esenkeldi (70 keli), Nurbek Oralbaı (90 keli) bar.
Eske salsaq, 15 maýsymda álem kýbogy ekinshi kezeńinde el quramasynan Sabyrjan Aqqalyqov (80 keli), Nurbek Oralbaı (90 keli), Serik Temirjanov (60 keli), Aıbek Oralbaı (90 keliden joǵary), Dına Islambekova (80 keliden joǵary) jarysty jalǵastyrýǵa múmkindik aldy.
Ókinishke qaraı el quramasynan Natalıa Bogdanova (75 keli) qarsylasyna ese jiberip, jarys jolynan shyǵyp qaldy.
