Qazaqstandyq boksshy qyzdar Azııa chempıonatynyń fınalyna shyqty
ASTANA. KAZINFORM — Tashkentte bokstan ótken 17 jasqa deıingi qyzdar arasyndaǵy Azııa chempıonatynyń jartylaı fınalynda Qazaqstan quramasynyń 8 sportshy baq synady. Bes sportshy fınalǵa ótip, úsheýi qola júldeni ıelendi, dep habarlaıdy Qazaqstan boks federatsııasy.
Altyn medal úshin beldesýge joldama alǵandar: Hatshepsýt Sádýaqasova (50 keli), Balym Ǵabıtqyzy (60 keli), Aıaýlym Ospanova (66 keli), Dıana Nadyrbek (75 keli), Jansaıa Erjan (80 keli).
Týrnırdiń qola júldegerleri Mılana Inshına (46 keli), Rozalııa Vaıdeman (57 keli) jáne Aılın Hodjamberdıeva (70 keli).
Azııa chempıonatynyń fınaldyq beldesýleri 15 mamyrǵa josparlanǵan.
Aıta keteıik, World Boxing federatsııasynyń uıymdastyrýymen ótken álem kýbogynyń birinshi kezeńin Qazaqstan quramasy medaldar kestesinde qaı oryn alǵany belgili boldy.
