Qazaqstandyq bloger Ýıll Smıtke shapan japty
ASTANA. KAZINFORM – Qazaqstandyq saıahatshy, bloger Dastan Muhamedrahym amerıkalyq akter Ýıll Smıtke qazaqtyń ulttyq shapanyn kıgizdi.
Áleýmettik jelilerde @bydastann degen atpen tanymal bloger kınojuldyzben Dýbaıdaǵy is-sharada kezdesken. Dastan Instagram uıymdastyrǵan, álemge áıgili blogerler men qoǵam qaıratkerleriniń basyn qosqan is-sharaǵa shaqyryldy. Dál sol jerde oǵan bir keledi, sóıtip kútpegen jerden akterge shapan syılady.
Ártis óner kórseter aldynda bloger shapanyn daıyndap, ony juldyzǵa syılamaqshy bolady. Ol Ýıll Smıt sahnaǵa shyǵar aldynda Instagram-daǵy Stories bóliminde oqyrmandaryna josparyn aıtty.
- Ýıll Smıt qazir bes mınýttan keıin shyǵady. Men aldyńǵy qatarǵa otyryp, shapandy daıyndap otyrmyn jáne ony oǵan kıgizýge tyrysamyn. Men úshin duǵa etińizder, - dedi Dastan is-shara aldynda.
Akter óner kórsetkennen keıin bloger sahnaǵa shyǵyp, Ýıll Smıttiń ústine shapan jaýyp úlgergen. Ol is-shara ótken soń pikir bildirdi.
- Ol bizdiń shapanymyzdy kıip júr, - dedi Dastan.
Onyń aıtýynsha, bári kútpegen jerden jáne óte tez bolǵan.
- Elestetip kórińizshi. Men Ýıll Smıtke múldem kútpegen jerden shapan japtym. Basqa eshkimniń onymen sýretke túsýge ýaqyty bolmady, tek men ǵana ýaqyt taptym, - dep bólisti bloger Instagram-daǵy Stories-te.
Dastan Muhamedrahım Instagram-da Qazaqstannyń ásem tabıǵaty týraly beınejazbalarymen tanymal. Onyń vıdeolarynda sheksiz dala, taý, gúldengen alqaptar, qyzǵaldaqpen kómkerilgen betkeıler jáne týrıster sırek baratyn eldiń shalǵaı jerleri kórinis tapqan. Shamamen toǵyz jyl boıy bloger Qazaqstan aımaqtaryn aralap, elimizdiń sulý tabıǵatymen tanystyryp júr.
Onyń paraqshasynda 1,3 mıllıonnan astam jazylýshy bar. Dastannyń vıdeolary Qazaqstannan tys jerlerge de taralyp, mıllıondaǵan qaralym men laık jınaıdy.
Onyń paraqshasyna sheteldik oqyrmandar pikir jazyp, Qazaqstannyń tabıǵatyna tamsanyp jatqanyn baıqaýǵa bolady.