Qazaqstandyq bızneske AQSh naryǵyna jol ashatyn memorandýmǵa qol qoıyldy
ASTANA. KAZINFORM - Astanada ótken «Qazaqstan Respýblıkasy – Amerıka Qurama Shtattary» bıznes-dóńgelek ústeli aıasynda «Atameken» Ulttyq kásipkerler palatasy men AQSh Saýda palatasynyń Amerıkalyq – Qazaqstandyq iskerlik keńesi arasynda strategııalyq áriptestik jónindegi memorandýmǵa qol qoıyldy.
Qujat eki eldiń bıznes qaýymdastyqtary arasyndaǵy tikeleı baılanysty damytýǵa, birlesken ınvestıtsııalyq jobalardy iske asyrýǵa jáne ınstıtýtsıonaldyq yntymaqtastyqty nyǵaıtýǵa baǵyttalǵan.
Jıynǵa Qazaqstan men AQSh-tyń memlekettik organdary, bıznes ókilderi, halyqaralyq korporatsııalar, qarjy ınstıtýttary men sarapshylar qatysty. Taraptar saýda-ekonomıkalyq jáne ınvestıtsııalyq yntymaqtastyqty keńeıtý joldaryn talqylady.
Іs-sharada «Atameken» UKP Tóralqa tóraǵasy Qanat Sharlapaev Qazaqstan men AQSh arasyndaǵy áriptestik endi tek saýdamen shektelmeı, birlesken óndiris, tehnologııa almasý jáne jańa ınvestıtsııalyq jobalarǵa oıysyp jatqanyn aıtty.
– Biz kapıtal tartýmen ǵana shektelmeı, zamanaýı óndirister qurýǵa, tehnologııalar transferine, ınnovatsııalardy damytýǵa jáne ekonomıkalyq ósýdiń jańa núktelerin qalyptastyrýǵa múddelimiz. Qazaqstan eki el úshin de uzaq merzimdi ekonomıkalyq qundylyq qalyptastyratyn áriptestikti damytýǵa umtylady, - dedi Qanat Sharlapaev.
Kezdesýde krıtıkalyq materıaldar men sırek jer metaldaryn ıgerý, Transkaspıı halyqaralyq kólik baǵytyn damytý, tsıfrlyq ekonomıka, jasandy ıntellekt, fınteh jáne agroónerkásip salasyndaǵy birlesken jobalar talqylandy.
Dóńgelek ústelge Shell, Wabtec, Mastercard, Chevron, Apple, Honeywell, Citi, ExxonMobil, Baker Hughes, Viasat jáne basqa da halyqaralyq kompanııalardyń ókilderi qatysty.
Eske salaıyq, buǵan deıin AQSh Qazaqstan bıznesin qoldaýǵa daıyn ekeni jóninde materıal jazǵanbyz.
