Qazaqstandyq bıshiler «Slavıan bazary» baıqaýynda jeńiske jetti
ALMATY. KAZINFORM — «Vıtebsktegi slavıan bazary» jarysy aıasynda ótken halyqaralyq Dream Dance Fest baıqaýynda qazaqstandyq «Jas órken» bı ansambli 1-orynǵa ıe boldy.
Halyqaralyq bı jarysy Belarýs eliniń Vıtebsk qalasynda ótken. «Jas órken» jetekshisi Aıda Kelgenbaevanyń aıtýynsha, qazaqstandyq bıshi qyzdar 20 shaqty komandany artta qaldyryp, 1-oryndy jeńip alǵan. Al Gran-Prı júldesi Belarýs eliniń ujymyna berilgen.
— «Slavıan bazary» aıasynda Dream Dance Fest horegrafııalyq baıqaýy óte joǵary deńgeıde ótti. Ártúrli memleketterden kelgen 20-dan asa bı ansamblderi qatysty. Solardyń ishinde top jaryp, 1-orynǵa ıe bolǵanymyzǵa óte qýanyshtymyz. Bul biz úshin birinshi halyqaralyq jarys emes. Byltyr Grýzııaǵa baryp, onda da birinshi oryn alǵanbyz. Oǵan deıin Túrkııa elindegi jarysqa qatysqanymyz bar. Biraq solardyń ishinde osy «Slavıan bazaryndaǵy» iri jarysta jeńiske jetkenimizge qýanamyz, — dedi Aıda Kelgenbaeva.
Sondaı-aq ol «Jas órken» bı ansambli 2007 jyly qurylǵanyn atap ótti. Top jetekshisiniń aıtýynsha, qazir ansamblde 150-deı bala bar. Negizgi baǵyty — ulttyq bıler. Degenmen, estardalyq jáne zamanaýı bıler de úıretiledi.
— Biz Belarýs elinde aqqý bıin bıledik. «Sarmad» etno-folklorlyq ansambliniń «Kórkem saz» degen áýenine bı qoıdyq. Osy bı arqyly qazaq qyzdarynyń náziktigin, qarapaıymdylyǵyn, sypaılyǵyn kórsetkimiz keldi. Sol maqsatymyzǵa jettik dep oılaımyn. Óte áserli qoıylym boldy. Sol jaqtyń ádilqazylary, kórermenderi qazaqtyń kıimderine, bıine tánti boldy, — dep atap ótti ol.
Aıda Kelgenbaeva Vıtebsk qalasynda ótken jarysta ádilqazylardyń daýys berýi jabyq ótkenin jáne ashyq talqylaý bolmaǵanyn aıtty.
— Biz birinshi oryn alǵandyqtan, ádilqazylar joǵary baǵalady dep oılaımyn. Biraq jabyq daýys berý boldy. Ár ansambl óner kórsetken soń, birden baǵalaý paraqtaryna upaı jazylyp, ony kýratorlar jınap alyp ketedi eken. Bizde sekildi talqylaý bolmaıdy. Sol upaılardy sońynda sanap, jeńimpazdy anyqtady, — dedi ansambl jetekshisi.
Qazaq bıin Eýropada pash etip, joǵary nátıjege jetken bıshi qyzdar qazirgi ýaqytta elge oralǵan. Aıda Kelgenbaeva bul jarys ansambl úshin úlken tájirıbe bolǵanyn atap ótti.
— Kóńil-kúıimiz óte jaqsy. Sebebi osyndaı halyqaralyq jarysta abyroımen qaıtqanymyzǵa qýanyshtymyz. Munda qanshama talantty balalardy, ustazdardy kórdik. Olardan sabaq aldyq. Bilimimizdi tolyqtyryp keldik dep aıta alamyn, úlken tájirıbe boldy, — dedi ol.
Eske salaıyq, buǵan deıin Saǵyn Ómirbaıuly «Slavıan bazarynyń» balalar baıqaýynda ekinshi oryn alǵan edi.
Aıta keteıik, buǵan deıin Qazaqstannyń halyq ártisi Roza Rymbaeva «Slavıan bazary» baıqaýynda qazylar alqasynyń tóraǵasy bolyp taǵaıyndalǵanyn habarlaǵan edik.
