Qazaqstandyq bıatlonshy álem kýbogy kezeńinde ekinshi ret iz kesý jarysyna joldama aldy
ASTANA. KAZINFORM – Qazaqstandyq bıatlonshy Vladıslav Kıreev Álem kýbogynyń jalpy esebinde kezekti upaılaryn enshiledi.
Búgin, 12 jeltoqsanda, Avstrııanyń Hohfıltsen qalasynda ótip jatqan álem kýbogy kezeńi aıasynda ol 10 shaqyrymdyq sprınt jarysyna qatysty.
Qazaqstandyq sportshy bir márte múlt ketip, márege 33-orynmen jetti. Bul nátıje oǵan segiz upaı ákeldi. Qazir Vladıslav Kıreevtiń enshisinde 14 upaı bar.
Osylaısha, ol maýsym barysynda ekinshi ret iz kesý jarysyna joldama aldy. Sonymen qatar Áset Dúısenov te iz kesý jarysyna ótti. Ol sprıntte 53-shi nátıjeni kórsetti. Vadım Kýrales 97-shi orynmen shekteldi.
QR UOK málimetinshe, ıtalııalyq Tommazo Djakomel jarys jeńimpazy atansa, kúmis júlde frantsııalyq Erık Perroge buıyrdy. Germanııa ókili Fılıpp Horn qola júldeger atandy.
Qazaqstandyq shańǵyshylar komandalyq sprıntte baq synaıtynyn jazǵan edik.