Qazaqstandyq bes boksshy «Strandja» kýbogynda alǵashqy jeńisin toılady
ASTANA. KAZINFORM - Qazaqstandyq boksshylar Bolgarııa astanasy Sofııa qalasynda 23 aqpan-2 naýryz aralyǵynda ótetin «Strandja» halyqaralyq týrnırin sátti bastady.
Qazirge deıin sharshy alańǵa shyqqan qazaqstandyq alty boksshynyń beseýi jarysty jalǵastyrýǵa múmkindik aldy.
El quramasynan Farýh Toqtasynov (70 keli) 1/16 fınalda Aýstrııa ókili Arsen Chabıannan 5:0 esebimen basym tústi. Jekpe-jek barysynda otandasymyz qarsylasyn nokdaýnǵa da túsirdi. Byltyr Farýh osy týrnırdiń kúmis júldegeri atanǵan edi.
Al Baǵlan Kenjebek (55 keli) 1/16 fınalda 2 dúrkin Eýropa chempıony atanǵan ázerbaıjandyq Nıdjat Gýseınovten 5:0 esebimen basym tústi. Ol Bolgarııadaǵy básekege alǵash ret qatysyp jatyr.
Sondaı-aq el quramasynan Tımýr Qabdeshov (55 keli) birinshi aınalymda Lıverpýldegi álem chempıonatynyń qola júldegeri Petsı Djoısqa (Irlandııa) tap boldy. Ataqty qarsylaspen kezdesse de, ol ony 5:0 esebimen tize búktirdi.
Ulttyq qurama sapynda endi 70 kelige aýysqan Muhammedsabyr Bazarbaıuly birinshi aınalymda jastar arasyndaǵy álem chempıony ózbekstandyq Abdýlazız Jýrakýlovti tóreshilerdiń biraýyzdan sheshimimen orta jolda qaldyrdy.
Álem chempıonatynyń qatysýshysy, 90 kelidegi Nýrmagamed ıÝsýpov 1/16 fınalda Ýels sportshysy Konnor Ýılıamsten 4:0 esebimen basym tústi.
El quramasynan 50 kelide Bekzat Aldamjarov ózbekstandyq Asylbek Jalılovke ese jiberip, jarys jolynan shyǵyp qaldy.
Endi keshki sessııada ulttyq quramadan tórt boksshy sharshy alańǵa shyǵady. Olardyń qatarynda 60 kelide Beıbarys Jeksen, mońǵolııalyq Lýndaa Gantýmýr (Mońǵolııa), Rýslan Kýzeýbaev AQSh boksshysy Salım Ellıs-Beı, 80 kelide Sanjaráli Begalıev brazılııalyq Kaýe dos Santos Belını, AQSh-tyń taǵy bir ókili Dıas Moljigitov Robbı Gonsalespen qolǵap túıistiredi.
Aıta ketsek, halyqaralyq týrnırde keshki sessııa Qazaqstan ýaqytymen 21:00–de bastalady.