Qazaqstandyq bapker 10 jylǵa bas bostandyǵynan aıyryldy

ASTANA. KAZINFORM – Aqmola oblysy Arshaly aýdany Balalar men jasóspirimder sport mektebi shańǵy sportynyń jattyqtyrýshysy «Sh» esirtki zattardy taratýmen zańsyz aınalysqan úshin 10 jylǵa bas bostandyǵynan aıyryldy.

Aqmola oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti taratqan málimetke súıensek, Arshaly aýdanynda ótkizý úshin Astanadan esirtki zattaryn tasymaldaý kezinde «Sh»-ny polıtsııa qyzmetkerleri ustaǵan jáne onyń avtokóligin tintýde jalpy salmaǵy 39 kg asatyn gashısh salynǵan 4 paket tabylyp, tárkilengen.

«Osylaısha «Sh.» esirtki zattaryn satý úshin asa iri mólsherde zańsyz satyp alýdy, saqtaýdy, tasymaldaýdy júzege asyrdy (Qylmystyq kodekstiń 297-baby 3-bóliginiń 3-tarmaǵy). «Sh.»-nyń kinási onyń avtomashınasyn tintý jáne esirtki zattary salynǵan paketterdi alý hattamasymen; sarapshylardyń qorytyndylarymen; tirkelgen qońyraýlary kórsetilgen uıaly telefondy tekserý hattamasymen; beınekameralardyń jazbalarymen; tintý hattamalarymen; «Sh.»-dan jeke paıdalanýǵa arnalǵan esirtki zatyn satyp alǵan kýágerlerdiń aıǵaqtarymen jáne istiń basqa da materıaldarymen dáleldendi. Jaza taǵaıyndaýda sot jeńildetetin mán-jaılardy - sottalýshyda jas balalardyń bolýyn, jáne aýyrlatatyn mán-jaılardyń bolmaýyn eskerdi» delingen habarlamada.

Sot úkimimen «Sh» 10 jylǵa bas bostandyǵynan aıyryldy. Tárkilengen esirtki zattar joıyldy.

Úkim zańdy kúshine engen joq.