Qazaqstandyq banktiń Tashkenttegi fılıalynan 90 myń dollar urlandy
TAShKENT. KAZINFORM – Alaıaqtar «Qazaqstan Halyq Banki» aktsıonerlik qoǵamynyń enshiles Tenge Bank-tiń Tashkenttegi fılıalynan 90 myń dollar urlaǵan, dep habarlaıdy Kazinform agenttiginiń menshikti tilshisi.
Ózbekstan Іshki ister mınıstrliginiń málimetine saı, quqyq qorǵaý organdaryna aqsha urlyǵy týraly aryz bıyl maýsym aıynda túsken. Tergeý barysynda anyqtalǵandaı, alaıaqtar POS-termınalǵa jalǵan derekterdi engizgen, keıin bankke baryp, 90 myń dollardy qolma-qol alyp ketken.
Іshki ister basqarmasynyń qyzmetkerleri aqsha urlady degen kúdikpen 9 adamdy ustady. Qolǵa túskenderdiń biri mundaı alaıaqtyq shemany Telegram arnalary arqyly taýyp, ony tolyq zerttegenin aıtty. Tıisinshe, jospardy iske asyrý úshin olar bank qyzmetkerimen sóz baılasyp, onyń kómegimen baǵdarlamany jetildire túsken.
Mınstrliktiń baspasóz qyzmetinen málim etkendeı, ustalǵandardan 12 uıaly telefon, POS-termınal jáne 36,5 myń dollar tárkilengen.
Naqtylaı keteıik, Ózbekstanda jumys isteıtin Tenge Bank 100% «Qazaqstan Halyq Banki» aktsıonerlik qoǵamynyń enshiles kompanııasy sanalady. Ol Tashkenttegi qyzmetin 2019 jyly bastaǵan.
Eske salaıyq, byltyr Ózbekstannyń Ortalyq banki alaıaqtar urlaǵan 9,5 mlrd somdy (shamamen $732 myń) buǵattap tastaǵan.