Qazaqstandyq bankter memleketke qansha qarjy qaıtarýy tıis

ASTANA. KAZINFORM – QR Qarjy naryǵyn retteý jáne damytý agenttigi elimizdegi ekinshi deńgeıli bankterdiń balansynda qansha memlekettik qarajat baryn málim etti, dep habarlaıdy Kazinform agenttiginiń tilshisi.

Málimetke saı, 2023 jyldan 2025 jyldyń mamyryna deıin tórt bank jalpy somasy 409,6 mlrd teńge kóleminde memlekettik qoldaý qarajatyn merziminen buryn ishinara qaıtardy, sonyń ishinde:

• «Qazaqstan Halyq Banki» AQ memleketke 250 mlrd teńge kóleminde qarjyny qaıtardy (onyń 68,4 mlrd teńgesi 2023 jyly jáne 181,6 mlrd teńgesi 2024 jyly);

• «Jusan Bank» AQ 2024 jyly «Samuryq-Qazynadan» shyǵarylǵan 100 mlrd teńge kólemindegi sýbordınatsııalyq oblıgatsııalardy merziminen buryn satyp aldy;

• «Bank RBK» AQ jáne «Bank TsentrKredıt» AQ jalpy somasy 59,6 mlrd teńge kóleminde memlekettik qarajatty ishinara merziminen buryn qaıtardy (onyń ishinde Bank RBK — 29,6 mlrd teńge jáne BTsK – 30 mlrd teńge).

Qazirgi ýaqytta bes banktiń balansynda qarjylyq turaqtylyqty qamtamasyz etý jáne saýyqtyrý maqsatynda berilgen 1,4 trln teńge kóleminde memlekettik qarajat bar. Olar:

• «Bank TsentrKredıt» AQ — 30 mlrd teńge;

• «Eýrazııalyq bank» AQ — 150 mlrd teńge;

• «Bank RBK» AQ — 214,1 mlrd teńge;

• «Jusan Bank» AQ — 1 000,2 mlrd teńge;

• «Nurbank» AQ — 46,8 mlrd teńge.

Esterińizge sala keteıik, jaqynda Jusan Bank-ke rebrendıng jasalyp, Alatau City Bank dep atalady. 

Banktiń baspasóz qyzmeti ataý ózgerisi memleket aldyndaǵy mindettemelerge áser etpeıtinin rastady.

Sondaı-aq agenttikten atap ótkendeı, memlekettik qoldaý aıasynda bólingen qarajat banktermen jasalǵan kelisimshart talaptaryna sáıkes qaıtarylady.

Kazinform agenttigi bul qarajattardyń óteý kestesine qatysty Qazaqstannyń ornyqtylyq qoryna suraý saldy. Alaıda qor «bul aqparat ashyq málimetter sanatyna jatpaıtynyn» aıtyp, jaýap berýden berýden bas tartty.

Eske sala keteıik, buǵan deıin Ulttyq Bank 2017-2020 jyldary «QR bank sektorynyń qarjylyq turaqtylyǵyn arttyrý» baǵdarlamasy aıasynda ekinshi deńgeıli birqatar bankke shamamen 700 mlrd teńge kóleminde sýbordınatsııalanǵan oblıgatsııalyq qaryz bólgenin málim etti. 

Sondaı-aq Ulttyq bank basshysy Tımýr Súleımenov bankter «Báıterek» UBH men «Samuryq-Qazyna» AQ satyp alǵan óte uzaq merzimdi jáne óte jeńildetilgen oblıgatsııalar shyǵarǵanyn, jalpy memlekettik kómek kólemi 1,4 trln teńge bolǵanyn atap ótti.