Qazaqstandyq bank sharýalarǵa 6% deıingi mólsherlememen nesıe beredi
Úkimette Premer-Mınıstrdiń orynbasary Serik Jumanǵarınniń tóraǵalyq etýimen agroónerkásip keshenindegi (AÓK) qarjy ınstıtýttary (Qazaqstannyń Damý banki, Agrarlyq nesıe korporatsııasy, «Báıterek» UBH) men Halyk Bank basshylarynyń keńesi ótti, dep habarlaıdy Kazinform.
Rrimeminister.kz saıtyndaǵy málimetke súıensek, taraptar jeńildikpen qarjylandyrý úshin agrarlyq jobalardyń basym baǵyttaryn, sondaı-aq nesıeler boıynsha syıaqy mólsherlemesiniń shekti deńgeıi jóninde ýaǵdalasty.
Jalpy sheshim – sharýalar úshin syıaqynyń 6% aspaıtyn shetki mólsherlemesi jáne aýyl sharýashylyǵyn damytýdyń memlekettik saıasatynyń talaptaryna jaýap beretin jobalardy úzdiksiz qarjylandyrý.
Halyk Bank AÓK salasyndaǵy jobalardy sharýalarǵa memlekettik sýbsıdııalar bólý kezinde Úkimet jáne «Báıterek» holdıngimen birlesip qarjylandyrýǵa daıyn.
Keńeste Halyk Bank basqarma tóraǵasy Úmit Shaıahmetova banktiń memlekettik qoldaý nysanyn birinshi kezekte tereń óńdeýge aýystyrý týraly sheshimdi qoldaıtynyn, sondaı-aq Úkimettiń AÓK salasyndaǵy bastamalaryn belsendi túrde qoldaýǵa daıyn ekenin aıtty.
Qazaqstannyń Damý banki men Agrarlyq nesıe korporatsııasynyń basshylary aýyl sharýashylyǵy salasyndaǵy memlekettik saıasattyń basym baǵyttaryna jaýap beretin jobalar úshin ekinshi deńgeıdegi banktermen birlesip qarjylandyrýdy, sındıkattaýdy qaraýǵa daıyn ekenderin rastady.
«Aýyl sharýashylyǵyn damytýdyń basym baǵyttary negizinen qazaqstandyqtardyń azyq-túlik sebetimen aıqyndalǵan. Bul tutyný shyǵyndarynyń jartysyn quraıtyn taýarlardyń alty negizgi toby: et (17%), nan jáne jarma (8%), sút ónimderi (5%), kókónister (4%), jemister (4%), qant jáne kondıterlik ónimder (3,6%). Sondyqtan bizdiń mindetimiz – bul ónimderdi elde óndirýdi qamtamasyz etý jáne tutynýshy úshin olardyń qunyn tómendetý. Osy maqsatta memleket birinshi kezekte týarly sút fermalaryn, kókónis qoımalaryn salý, mal sharýashylyǵyn damytý, sýarý, dándi daqyldardy, etti, jemister men kókónisterdi óńdeý jónindegi jobalardy jeńildikpen qarjylandyratyn bolady», — dedi Serik Jumanǵarın.
Aýyl sharýashylyǵy mınıstrliginiń derekteri boıynsha AÓK-tiń qaıta óńdeý salasyndaǵy jalpy quny 1,6 trln teńgeni quraıtyn áleýeti bar 500 jobanyń pýly qalyptastyryldy. Jeńildetilgen qarjylandyrýǵa úmitker ár joba kóptegen krıterıı boıynsha tekseriledi, sonyń ishinde qaryz alýshy kásiporyn modeliniń bıznes turaqtylyǵy jáne onyń iskerlik bedeli qaralady.
Pýl quramy áli de ózgerýi múmkin, aldaǵy úsh jylda negizgi maqsattarǵa qol jetkizý úshin – AÓK-tiń jalpy óniminiń kólemin 2,6 trln teńgege jáne AÓK-te qaıta óńdelgen ónim kólemin 30%-dan 70% deıin ulǵaıtý úshin perspektıvaly jańa jobalarmen tolyqtyrylatyn bolady
