Qazaqstandyq balýan Rızabek Aıtmuhan álem chempıonatynyń fınalynda óner kórsetedi
ASTANA. KAZINFORM – Qazaqstandyq balýan Rızabek Aıtmuhan Ispanııanyń Pontevedra qalasynda kúres túrlerinen 20 jasqa deıingiler arasynda ótip jatqan álem chempıonatynyń fınalyna joldama aldy.
Qazaqstandyq erkin kúres sheberi 97 kelige deıingi salmaqta aldymen ırandyq Abolfazla Davýd Babalany 12:1 esebimen merziminen buryn tize búktirdi. Sodan keıin shırek fınalda grekııalyq Nıkolaos Karavanosty dál sondaı eseppen qapy qaldyrdy.
Rızabek jartylaı fınalda amerıkalyq Djastın Reıdmaherdi de aıqyn basymdylyqpen utty – 9:1. Fınaldyq beldesý 7 qyrkúıek kúni bolady.
Rızabek Aıtmuhan ótken jyly 19 jasynda eresekter arasynda 92 kelige deıingi salmaqta aıdy aspanǵa shyǵaryp, táýelsiz Qazaqstan tarıhynda erkin kúresten alǵash ret álem chempıony atanǵan bolatyn.
Eske sala keteıik, budan buryn qazaqstandyq balýannyń jastar arasynda álem chempıony atanǵanyn jazǵan bolatynbyz.
