Qazaqstandyq balýan Azııa chempıonatynyń fınalyna shyqty
ASTANA. KAZINFORM — Kúres túrlerinen Qyrǵyzstan astanasy Bishkek qalasynda Azııa chempıonaty ótip jatyr.
Búgin grek-rım kúresinen qazaqstandyq tórt balýan jartylaı fınalda baq synady.
Solardyń ishinen Almaty oblysynyń ókili Almatbek Amanbek qana fınalǵa joldama aldy. Almatbek 72 kelige deıingi salmaqta qyrǵyzstandyq, Azııa oıyndarynyń, álem jáne Azııa chempıonatynyń qola júldegeri Amantýr Ismaılovqa qarsy keldi.
Kilem ıesi favorıt sanalǵanymen, qazaqstandyq balýan tabandylyq tanytyp, 3:1 esebimen tize búktirdi. Sóıtip, sensatsııa jasaǵan A.Amanbek erteń altynǵa talasady.
Taǵy bir qazaqstandyq Erbol Kamalıev 60 kelige deıingi salmaqta jartylaı fınalda Parıj olımpıadasynyń jáne 2025 jylǵy álem chempıonatynyń qola júldegeri Se Ýn Rıden taza utyldy — 0:8.
Ibragım Magomadov 82 kelige deıingi salmaqta jartylaı fınalda qatarlyq Shahın Badahımofradty jeńip jatyp, ese jiberdi — 8:9.
Sondaı-aq Islam Evloev 97 kelige deıingi salmaqta jartylaı fınalda ataqty ırandyq balýan, Olımpıada chempıony Mohammadhadı Saravıdan óte almady — 1:3.
E.Kamalıev, I.Magomadov jáne I.Evloev erteń qola júlde úshin kúresedi.
Búgin keshke Qazaqstannan Qaharman Qısmetov (77 kg) pen Nursultan Tursynov (87 kg) qola júldeni sarapqa salady.
Eske sala keteıik, budan buryn Bishkekte ótetin kúres túrlerinen Azııa birinshiligine kimder qatysatynyn jazǵan bolatynbyz.
