Qazaqstandyq balýan Aıbatyr Mırazat kýrashtan álem chempıony atandy
ASTANA. KAZINFORM — Batysqazaqstandyq balýan Aıbatyr Mırazat Astana qalasynda kýrashtan eresekter arasynda ótip jatqan álem chempıonatynda top jardy.
Astana qalasynda alǵash ret uıymdastyrylǵan XV álem chempıonatynda 71 memleketten 450 sportshy baq synaýda.
Erler men áıelder barlyǵy 16 salmaq dárejesinde medaldardy sarapqa salýda.
Qazaqstan ulttyq quramasy (bas bapkeri Ǵumar Qyrǵyzbaev) 16 balýandy dodaǵa qosty.
Jaqsylyq Úshkempirov atyndaǵy Jekpe-jek saraıynda jarystyń birinshi kúni Aıbatyr Mırazat 60 kelige deıingi salmaqta úzdik shyqty.
Balýannyń ákesi Aıbek Ishanovtyń málim etkenindeı, Aıbatyr aldymen túrik, sodan keıin qyrǵyz sportshysyn jeńdi. Jartylaı fınalda ózbek balýanynan aılasyn asyrdy.
— Sońǵy básekede tájikstandyq Haqdod Gýlovpen beldesti. Balam buǵan deıin Dýshanbede ótken Azııa chempıonatynda dál osy balýanǵa ese jiberip, kúmis júldege ıe bolǵan edi.
Sonyń qarymtasyn Astanada qaıyrdy. Sondaı-aq Aıbatyr — qazaq kúresinen eresekter arasynda Qazaqstan kýbogynyń eki dúrkin jeńimpazy, 23 jasqa deıingiler arasynda el chempıony jáne Qajymuqan atyndaǵy álem kýbogynyń kúmis júldegeri, — dedi A.Ishanov.
Eske sala keteıik, budan buryn Fatıma Supyǵalıevanyń bolashaqta Ýta Abe, Dıera Keldıerovamen kezdesýi múmkin ekendigi týraly aıtqanyn jazǵan bolatynbyz.
