Qazaqstandyq balýan áskerıler arasynda álem chempıony atandy
ASTANA. KAZINFORM – Qazaqstandyq balýan Meıirjan Áshirov Armenııa astanasy Erevanda kúres túrlerinen áskerıler arasyndaǵy álem chempıonatynda top jardy.
Qazaqstan kúres federatsııasynan málim etkenindeı, efreıtor Meıirjan Áshirov erkin kúresten 70 kelige deıingi salmaqta úzdik shyqty.
Ol aldymen reseılik Inal Ketııamen beldesti. Kezdesý 1:1 esebimen teń aıaqtalǵanymen, sońǵy upaıdy alǵany úshin jeńis Meıirjanǵa buıyrdy.
Meıirjan mońǵolııalyq O.Mergenshagaıdy 14:1 esebimen aıqyn basymdylyqpen tize búktirdi.
Úshinshi beldesýinde ırandyqty 10:0 esebimen utsa, fınalda úndi balýanyn qapy qaldyrdy – 6:2.
Sondaı-aq grek-rım kúresinen kishi serjant Aıdos Sultanǵalı (60 kg), áıelder kúresinen QR Qarýly kúshteriniń qyzmetshisi Svetlana Ankıcheva (50 kg) qola júldegerler qatarynan kórindi.
Eske sala keteıik, budan buryn qazaqstandyq balýandardyń kúresten áskerıler arasyndaǵy álem chempıonatyna qatysatynyn jazǵan bolatynbyz.