Qazaqstandyq balmuzdaqqa qaı elderde suranys joǵary
ASTANA. KAZINFORM — Qazaqstandaǵy balmuzdaq óndirýshileri bıylǵy jaz aılarynda jańa rekordtardy ornatty. Statıstıka derekterine qaraǵanda, resýrstyq baza men óndiris kóleminiń aıtarlyqtaı keńeıgeni baıqaldy. Bul jaǵdaı otandyq óndiristiń nyǵaıýymen qatar, eksporttyq-ımporttyq aǵyndardyń ózgergenin de aıǵaqtaıdy.
— Ulttyq statıstıka bıýrosynyń derekterine sáıkes, 2026 jyldyń qańtar-tamyzynda balmuzdaq pen taǵamdyq muz óndirý kólemi 77,5 myń tonnaǵa jetip, byltyrǵy jalpy kórsetkishten asyp tústi. 2025 jyldyń sáıkes kezeńimen salystyrǵanda, 57% ósim boldy. Atap aıtqanda, bıylǵy jazda óndiris kólemi rekordtyq deńgeıge jetkeni baıqaldy. Maýsym aıynda óndiris kólemi 20 myń tonnadan asyp, mamyr aıyndaǵy kórsetkishten eki esege kóp boldy, — delingen Energyprom.kz málimetinde.
Saýda kórsetkishteri ishki naryqtyń jergilikti kompanııalardaǵy óndiristiń ulǵaıýyna ońtaıly áser etkenin kórsetedi. Bıyldyń alǵashqy segiz aıynda ishki naryq kólemi shamamen 61%-ǵa ósti. Balmuzdaq pen basqa da taǵamǵa arnalǵan muzdatylǵan ónimderdi satý kólemi 72,6 myń tonnaǵa jetti. Bul óz kezeginde keıingi birneshe jyldaǵy rekordtyq kórsetkish.
Resýrstyq teńgerim balmuzdaq óndirýshi otandyq kásiporyndardyń ishki naryqtaǵy óz pozıtsııalaryn aıtarlyqtaı nyǵaıtqanyn aıqyndady. 2026 jyldyń qańtar-tamyzynda jalpy resýrstyq kólemdegi otandyq ónimniń úlesi 88,2%-ǵa jetti. Sheteldik ónimderdiń úlesi 11,8%-ǵa deıin tómendegenin eskersek, bul jaǵdaı — ımportty almastyrý baǵytyndaǵy taǵy bir qadam.
Qazaqstandyq óndiristiń ósýi ishki naryq áleýetin arttyryp qana qoımaı, eksport aýqymyn da keńeıtti. Bir jyl ishinde basqa elderge jóneltilgen ónim kólemi 28,9%-ǵa artyp, 15 300 tonnaǵa jetti. Bul — 2020 jyldan bergi jyldyq kórsetkishtermen salystyrǵanda buryn-sońdy bolmaǵan meje. Qazaqstandyq balmuzdaq Reseı, Qyrǵyzstan, Ózbekstan, Tájikstan, Mońǵolııa jáne basqa da elderde satylady.
Ulttyq statıstıka bıýrosynyń derekterine súıensek, bıylǵy qańtary men qyrkúıek aralyǵynda óndirýshiler balmuzdaq baǵasyn 9,5%-ǵa kótergen. Alaıda, baǵanyń ósýine tek ınvestıtsııalar ǵana emes, sonymen qatar ınflıatsııalyq qysym, sút baǵasynyń qymbattaýy jáne ónimniń túpkilikti qunyna kiretin basqa da shyǵyndar áser etýi múmkin.
Buǵan deıin Qazaqstanda koreı tehnologııasymen balmuzdaq óndirisi iske qosylatynyn jazǵan edik.
Eske salsaq, bıyl qazan aıynda Reseı Qazaqstannan balmuzdaq ákelýge ýaqytsha shekteý qoıdy.
