Elimizde balalarǵa onkologııalyq dáriler qoljetimdi bola ma
ASTANA. KAZINFORM — Qazaqstannyń Densaýlyq saqtaý mınıstri Aqmaral Álnazarova Samarqandta AQSh-tyń balalar onkologııasy salasyndaǵy jetekshi ortalyqtarynyń biri — St. Jude Children’s Research Hospital ókilderimen yntymaqtastyq perspektıvalaryn talqylady.
Mınıstrliktiń baspasóz qyzmeti atap ótkendeı, kezdesýde balalar obyryn emdeýdiń zamanaýı ádisterin engizý, qazaqstandyq mamandardy daıarlaý jáne isikke qarsy dárilik preparattardyń qoljetimdiligin arttyrý máselelerine basymdyq berildi.
Kezdesý gospıtaldiń atqarýshy vıtse-prezıdenti, St. Jude Global halyqaralyq baǵdarlamasynyń jetekshisi Karlos Rodrıges-Galındonyń qatysýymen ótti.
Taraptar balalarǵa joǵary tehnologııalyq medıtsınalyq kómek kórsetýdi damytý múmkindikterin, sonyń ishinde súıek kemigin transplantattaý, molekýlalyq dıagnostıka jáne jasýshalyq terapııanyń perspektıvaly ádisterin talqylady.
Sondaı-aq Shyǵys Qazaqstan oblysynda zamanaýı kópbeıindi gospıtal keshenin salý jobasyna erekshe nazar aýdaryldy. Josparǵa sáıkes, ol Shyǵys Qazaqstan, Pavlodar oblystary men Abaı oblysynyń balalaryna mamandandyrylǵan medıtsınalyq kómek kórsetetin óńiraralyq ortalyqqa aınalmaq.
Aqmaral Álnazarova St. Jude ortalyǵynyń tarapynan jobaǵa saraptamalyq qoldaý kórsetý múmkindigin qarastyrýdy, sondaı-aq qazaqstandyq dárigerlerdi oqytýdy, birlesken medıtsınalyq konsılıýmdar men ǵylymı zertteýler uıymdastyrýdy usyndy.
— Kezdesýdiń negizgi taqyryptarynyń biri Qazaqstannyń balalarǵa arnalǵan isikke qarsy dárilik preparattardyń qoljetimdiligin arttyrýǵa baǵyttalǵan St. Jude jáne Dúnıejúzilik densaýlyq saqtaý uıymynyń halyqaralyq baǵdarlamasyna qosylý múmkindigi boldy. Baǵdarlamaǵa qatysýshy elderdi balalardaǵy onkologııalyq aýrýlardy emdeýge arnalǵan sapaly dárilik preparattarmen qamtamasyz etý kózdelgen. Qazaqstannyń baǵdarlamaǵa qatysý sharttary halyqaralyq áriptestermen birlesip qosymsha pysyqtalatyn bolady, — delingen habarlamada.
Qazirgi ýaqytta qazaqstandyq medıtsınalyq uıymdar St. Jude Global Alliance halyqaralyq jelisiniń quramyna kiredi. Bul yntymaqtastyqty odan ári keńeıtýge negiz qalaıdy.
Basty maqsat — balalardyń zamanaýı dıagnostıka men emdeý ádisterine qoljetimdiligin keńeıtip, kishkentaı patsıentterdiń kóbirek bóligine qajetti medıtsınalyq kómekti óz elinde, otbasylarynyń janynda alýǵa múmkindik jasaý.
Kezdesý qorytyndysy boıynsha balalar onkologııasy, medıtsına kadrlaryn daıarlaý jáne dárilik zattarmen qamtamasyz etý baǵyttaryndaǵy birlesken jobalardy naqty pysyqtaýdy jalǵastyrý usynyldy.
Buǵan deıin qazaqstandyqtarǵa onkologııalyq emniń qandaı túrleri tegin kórsetiletinin jazdyq.
