Qazaqstandyq balalardyń jartysy 5-8 jasynda alǵash ret ınternetke kiredi
ASTANA. KAZINFORM – Negizgi tsıfrlyq daǵdylar balalyq shaqta qalyptasady. Sol sebepti bul kezeńde balalar tsıfrlyq qaýip-qaterlerge beıim. Jaqynda problemanyń túıinin tarqatýǵa kómektesetin qazaqstandyq qosymsha usynyldy.
Kid Security qosymshasynyń negizin qalaýshy Asat Ashamanovtyń aıtýynsha, baǵdarlama balanyń beıtanys adamdarmen sóılesip jatqanyn, sondaı-aq áńgimeniń jalpy mazmunyn baqylaýǵa múmkindik beredi. Solaı bola tura balanyń jeke keńistigin buzbaıdy.
— Tek kiris habarlamalar kórsetiledi, foto, vıdeo, daýystyq habarlamalar jáne tolyq hat almasý qoljetimdi emes. Aqparat qaýipsiz túrde óńdelip, ata-ananyń jeke kabınetinde usynylady. Osylaısha, qosymsha ata-analardyń ýaıymyn azaıtýǵa kómektesedi. Qosymshanyń Ortalyq Azııada analogy joq, — dedi Asat Ashamanov.
Kaspersky Lab júrgizgen zertteýge súıensek, balalar men jasóspirimder ınternetten keletin qaýipti jete túsinbeıdi eken. Psıhologtar da bul derekterdi rastap otyr.
Mysaly, jasóspirimderdiń 73%-y smartfonsyz ómirin elestete almaıdy, al 8-16 jas aralyǵyndaǵy balalardyń 44%-y únemi onlaın bolyp, ýaqyttyń kóp bóligin áleýmettik jelilerge jumsaıdy. Sonymen qatar árbir úshinshi jasóspirim onlaın platformalarǵa tirkelý kezinde jasyn úlkeıtip kórsetetini anyqtalǵan.
— UNICEF zertteýlerine sáıkes, qazaqstandyq balalardyń jartysyna jýyǵy ınternetke alǵash ret 5-8 jasynda kiredi, al shamamen 21%-y kıberbýllıngke tap bolady. Bul balanyń tsıfrlyq keńistiktegi qaýipsizdigin qamtamasyz etý qajettiligin aıqyn kórsetedi, — deıdi Qazaq Expert Club janyndaǵy psıhologııa salasynyń sarapshysy Jadyra Sabırova.
Mamannyń aıtýynsha, balalarmen senimdi qarym-qatynas ornatý óte mańyzdy.
— Qazir psıhologııalyq tájirıbe «qatań baqylaý» modelinen sanaly súıemeldeý modeline aýysyp keledi. Qazaqstanda da, halyqaralyq deńgeıde de osy úrdis baıqalady. ıAǵnı, ata-ana tek baqylap qoımaı, balamen dıalog quryp, qaýipti birge talqylap, erejelerdi kelisip, jaýapkershilikti birtindep balaǵa tapsyrýdy úıretýde, — deıdi spıker.
Endi 13 jasqa deıingi balalardyń WhatsApp akkaýnttary ata-anasynyń baqylaýynda bolatynyn jazǵan edik.