Qazaqstandyq BAQ qyzmetkerleri Prezıdent atynan páter aldy
ASTANA. KAZINFORM – Buqaralyq aqparat quraldary qyzmetkerleri kúninde Memleket basshysynyń tapsyrmasymen 16 otandyq BAQ qyzmetkerlerine saltanatty túrde páter sertıfıkattary tabys etildi.
QR Prezıdentiniń keńesshisi jáne baspasóz hatshysy Berik Ýálı áriptesterin merekemen quttyqtap, otandyq jýrnalıstıkanyń damýyna eleýli úles qosqanyn atap ótti.
«Byltyr Memleket basshysy «Dara» qory arqyly jýrnalısterge 65 páter tartý etken bolatyn. Bul páterlerdi memlekettik baǵdarlama arqyly emes, Prezıdenttiń tikeleı tartýy dep qabyldaýymyz kerek. Buǵan deıin jýrnalıster arasynda ne memlekettik qyzmetkerler sanatyna, ne bıýdjettik qyzmetkerler sanatyna ilige almaıtyny jáne memlekettik baǵdarlamalardyń ıgiligin kóre almaıtyny jıi aıtylatyn. Bul sózder aıtylǵan kúıi qalatyn, endi byltyrdan bastap Memleket basshysy jýrnalısterge páter kiltin tabystaýdy dástúrge aınaldyryp jatyr. Eń bastysy páter kiltteri memleketimizdiń damýyna, Memleket basshysy júrgizip otyrǵan reformalardy halyqqa jetkizýge atsalysqan áriptesterimizge berilýde. Bıyl 67 páter berildi jáne alǵash ret 3 bólmeli páterler tabys etildi», - dedi Berik Ýálı saltanatty sharada.
Onyń aıtýynsha, páter sertıfıkatyn alǵan jandar ishinde 21 kópbalaly otbasy, 5 jalǵyzbasty ana jáne erekshe qajettiligi bar bala tárbıelep otyrǵan 11 otbasy bar.
Mádenıet jáne aqparat mınıstri Aıda Balaeva jýrnalıster men BAQ qyzmetkerlerin kásibı merekesimen quttyqtady.
«Qurmetti áriptester, tól merekelerińiz qutty bolsyn! Prezıdent kesheden beri jýrnalıstıka salasynyń deńgeıin, jalpy mártebesin kóterip, sizderdiń eńbekterińizdi erekshe atap ótip jatyr. Memlekettik nagradalar, búgingi turǵyn úıdiń kiltin alý sonyń aıqyn kórinisi. Men úshin osy qýanyshty sizdermen bólisý eki ese baqyt. Eńbekterińizdi memleket baǵalaı bersin», - dedi Aıda Balaeva.
Páter alǵan BAQ qyzmetkerleri qatarynda Prezıdent Teleradıokesheniniń qyzmetkerleri de bar.
3 bólmeli páterdi Kazinform agenttiginiń aǵylshyn redaktsııasynyń shyǵarýshy redaktory Janna Nurmaǵanbetova aldy. Ol agenttikte 20 jyldan astam jumys isteıdi jáne 5 balanyń anasy.
Sondaı-aq, jańa 2 bólmeli páter kilti Kazinform agenttiginiń tilshisi Marlan Jıembaıǵa berildi, ol agenttikte 19 jyl jumys isteıdi jáne eń úzdik qyzmetkerleriniń biri bolyp sanalady.
Memleket basshysynyń mass-medıaǵa qosqan erekshe úlesi úshin jýrnalısterge páter tapsyrý bastamasyn «Dara» prezıdenttik bastamalar qory qoldady.
«Biz, qazaqstandyqtar – dana halyqpyz. Sóz qudiretin joǵary baǵalaımyz. Sondyqtan qalamdaryńyz muqalmasyn, jumystaryńyz árdaıym bıikten kórine bersin», - «Dara» qorynyń basshysy Ásel Shildebaeva.
2022 jyly qurylǵan «Dara» prezıdenttik bastamalar qorynyń qyzmeti kreatıvti sektordy damytýǵa, qazaqstandyqtardyń shyǵarmashylyq áleýetin iske asyrý úshin qolaıly jaǵdaılardy qamtamasyz etýge jáne jańa jumys oryndaryn qurýǵa baǵyttalǵan.
