Qazaqstandyq azamat Taılandta jol apatynan qaza tapty — BAQ

ASTANA. KAZINFORM — Taılandtyń Phýket qalasynda 1 sáýirde tún ortasynda mototsıkl mingen sheteldik jol apatynyń qurbany boldy, dep habarlaıdy Phýket jańalyqtary. 

Jergilikti basylymnyń habarlaýynsha, Bypass Rd kúre joly boıyndaǵy jol apatynda qaza tapqan sheteldik mototsıklshiniń Qazaqstan azamaty ekeni anyqtaldy. Qaza tapqan adamnyń jeke basyn Vachira Phuket Hospital aýrýhanasy rastady.

Kýágerlerdiń Facebook jelisinde taratqan aqparatyna sáıkes, Honda Forza mingen mototsıklshi qatty jyldamdyqpen kele jatyp, jaryq baǵanasyna soǵylǵan. Kusoldharm qorynyń qutqarýshylary uıaly telefonynyń ekranynda orys tilinde jazbalar turǵan soń bastapqyda ony Reseı azamaty bolýy múmkin dep shamalaǵan.

Buǵan deıin Ońtústik Koreıada jol apatynan Qazaqstannyń 4 azamaty mert bolǵanyn jazǵan bolatynbyz.