Qazaqstan áıelderi ǵaryshqa qashan ushady – Aıdyn Aıymbetovtiń jaýaby
ASTANA.KAZINFORM – Qazaqstandyq ǵaryshker, «Báıterek» birlesken kásipornynyń basqarma tóraǵasy Aıdyn Aıymbetov qazaqstandyq áıelderdiń ǵaryshtyq mıssııalarǵa qatysý múmkindigine qatysty pikir bildirdi.
Onyń aıtýynsha, qazirgi tańda Qazaqstannan áıel ǵaryshkerdi ushýǵa daıyndaýǵa arnalǵan jeke baǵdarlama joq.
– Qazaqstanda adam qatysatyn ǵarysh baǵdarlamasy da qarastyrylyp jatyr. Qazirgi ýaqytta jetekshi joǵary oqý oryndary men ǵylymı ınstıtýttardyń ǵalymdary ǵaryshqa ushý mıssııasyna arnalǵan ǵylymı baǵdarlama ázirlep jatyr. Alaıda ǵaryshqa dál áıelder ekıpajyn nemese naqty áıel ǵaryshkerdi jiberý týraly aıtýǵa áli erte. Men kóptegen suhbattarymda bizdiń qyzdarymyz jigitterimizden oza alatynyn aıtqanmyn. Óıtkeni qazirgi bilim deńgeıi kóp nárseni kórsetedi, - dedi ushqysh-ǵaryshker.
Sonymen qatar otandyq ǵalymdar uzaq ýaqytqa sozylatyn ǵarysh sapary jaǵdaılarynyń áıel aǵzasyna áserin zertteýdi jalǵastyrýdy josparlap otyr.
- Bolashaqta bul eksperıment, eń aldymen, jerde qaıtalanýy múmkin. Arnaıy jabyq nysanda uzaq ýaqytqa sozylatyn ǵarysh saparynyń jaǵdaılary modeldenip, mıdyń kognıtıvtik fýnktsııalary zertteledi, psıhomedıtsınalyq tájirıbeler júrgiziledi. Qazir osy jumystarǵa daıyndyq júrip jatyr, – dedi Aıdyn Aıymbetov.
Aıta keteıik, jaqyn arada ǵaryshqa qazaqstandyq ushýy múmkin ekenin jazǵanbyz.
