Qazaqstandyq áıel nekesiz týǵan balaǵa alıment óndirip alý úshin Konstıtýtsııalyq sotqa júgindi

ASTANA. KAZINFORM – Konstıtýtsııalyq Sot áıel adamnyń tirkelmegen nekede alıment alý quqyǵyna qatysty ótinishin qarady.

Konstıtýtsııalyq Sotqa «Neke (erli-zaıyptylyq) jáne otbasy týraly» Qazaqstan Respýblıkasy Kodeksiniń 147-baby 2-tarmaǵy 2) tarmaqshasynyń jáne 148-baby 1-tarmaǵy 1) tarmaqshasynyń Konstıtýtsııaǵa sáıkestigin qaraý týraly tirkelmegen nekede turǵan áıeldiń ótinishi kelip tústi.

Atalǵan normalar erli-zaıyptylar men burynǵy erli-zaıyptylardyń ortaq balasy týǵan kúnnen bastap úsh jyl boıy birin-biri kútip-baǵý jónindegi mindetin, sondaı-aq burynǵy jubaıynyń neke buzylǵannan keıin alıment alý quqyǵyn bekitedi.

Ótinish berýshi bul erejeler balasynyń ákesinen jeke materıaldyq qoldaý alýǵa konstıtýtsııalyq quqyǵyn buzady dep sanaıdy. Óıtkeni onyń pikirinshe, resmı tirkelgen nekeniń bolmaýy mundaı quqyqtar men zańdy múddelerdi shektemeýi kerek.

Konstıtýtsııalyq Sot daýlanyp otyrǵan normalar ótinish berýshiniń quqyqtary men bostandyǵyn tikeleı qozǵamaıtynyn atap ótti. Óıtkeni olar zańda belgilengen tártippen tirkelgen neke qatynastaryndaǵy (nemese buryn tirkelgen nekede bolǵan) erli-zaıyptylardyń quqyqtary men mindetterine qatysty.

Sonymen qatar Konstıtýtsııalyq Sot ótinish berýshiniń nazaryn atalǵan Kodekstiń 47-babynyń 5-tarmaǵyna aýdardy. Oǵan sáıkes tirkelmegen nekede turǵan balanyń anasy balanyń ákesinen óziniń asyraýyna aqsha qarajatyn óndirip alý týraly talappen sotqa júginýge quqyly.

Qaralyp otyrǵan jaǵdaıda ótinish berýshi buryn sotqa júginbegen jáne Kodekstiń 47-baby 5-tarmaǵynyń Konstıtýtsııaǵa sáıkestigin tekserý týraly daý aıtylmaǵan.

Osylaısha, ótinishti zerdeleý nátıjeleri boıynsha Konstıtýtsııalyq Sot ony konstıtýtsııalyq is júrgizýge qabyldaý úshin negiz joq dep tapty.

Aıta keteıik, Atyraýda alıment tóleýden jaltarǵan toǵyz adam qylmystyq jaýapqa tartyldy.