Qazaqstandyq áıel ǵalymdar jasandy ıntellektini qalaı baǵyndyryp jatyr
ASTANA. KAZINFORM — Qazaqstandaǵy ǵylymı qyzmetkerlerdiń 51,2 paıyzy áıelder bolǵanymen, PhD deńgeıine deıin jetip, iri jobalardy basqaratyndardyń úlesi áli de az.
Osyndaı az toptyń ishinde jasandy ıntellekt salasynda biregeı jobalardy júzege asyryp júrgen ǵalym Nurzada Amangeldiniń orny erekshe. Bul zertteýdiń mańyzy men ǵylymdaǵy áıelderdiń orny jaıly «Jibek Joly» telearnasynyń «Búgin.LIVE» baǵdarlamasynda aıtyldy.
Nurzada Amangeldi — Tsıfrlyq ǵylymdar jáne jasandy ıntellekt ınstıtýtynyń zertteýshisi.
Onyń Saimbridge startap jobasy estý qabileti buzylǵan jandarǵa arnalǵan sýrdoaýdarmany avtomattandyrýǵa kómektesedi. Onyń komandasy 2019 jyldan beri qazaqsha ymdaý tilin tanıtyn JI júıesin jetildirip keledi.
— Bul jobamen aınalysyp jatqanyma 7 jyl boldy. Qazir bizdiń JI negizindegi ónimimiz qoldanysqa enip otyr. Sýrdoaýdarma júıesin tolyqtaı qazaqshaǵa beıimdedik. Qazirgi tańda ymdaý tilin shynaıy ári keń aýqymdy aýdıtorııaǵa túsinikti etip aýdara alatyn avatar-keıipkerlerdi jetildirýmen aınalysyp jatyrmyz, — deıdi ǵalym Nurzada Amangeldi.
Ǵalymnyń negizgi mamandandyrylǵan salasy — kompıýterlik kórý (computer vision). Ol tek ymdaý tilimen shektelmeı, qashyqtyqtan ǵaryshtyq sýretterdi óńdeý jáne adam mıy men kompıýterdiń ózara árekettesýi (Brain-computer interaction) sııaqty kúrdeli baǵyttardy da ıgerip júr.
Onyń aıtýynsha, ǵylymda nátıjege jetý úshin jynystyq erekshelikke súıenýge bolmaıdy.
— Ǵylymǵa keldiń be — áıel ekenińdi umyt. Óıtkeni munda er nemese áıel dep bólinbeıdi, tek nátıje mańyzdy. Áıel adam áleýmettik mańyzy bar joba jasap jatqany úshin eshkim aldyna qyzyl kilem tósep bermeıdi. Statıstıkaǵa súıensek, Qazaqstanda ǵylymı qyzmetkerlerdiń jartysynan astamy áıelder bolǵanymen, PhD deńgeıindegi úles óte tómen. Bir doktorant qorǵasa, «sen sol 0,1 paıyzdyń ishine kirdiń» dep qýanamyz. Ǵylymnan bas tartatyn bolsam, men ózimdi joǵaltamyn. Ony ómirimnen bólip qaraý múmkin emes, — dep túıendedi ol.
Eske sala keteıik, ym tilin qazaqsha ǵylymı turǵyda zerttep, alǵashqy tsıfrlyq sýrdoaýdarma júıesin jasaǵan startap Tatler Impact Awards syılyǵy «Innovatsııa» atalymynyń úzdigi atanǵan.
Sonymen qatar, bul jobany qolǵa alǵan ǵalym Nurzada Amangeldi jaıly tolyǵyraq jazǵan edik.
