Qazaqstandyq áıel AQSh áleýmettik jelilerinde jyldyń úzdik modeli atandy
ASTANA. KAZINFORM – Qazaqstandyq Krıstına Menısov AQSh-ta ótken baıqaýda áleýmettik jelidegi jyldyń úzdik modeli atandy.
Áleýmettik jelilerde jyldyń úzdik modeli ataǵy úshin bes qatysýshy saıysqa tústi.
Daýys berý qorytyndysy boıynsha jeńiske jetken almatylyq model Krıstına Menısov ulttyq deńgeıdegi marapat – National Social Media Awards syılyǵyna ıe boldy.
«Men úshin osy joly daýys bergenderge jáne men qandaı is-sharaǵa qatyssam da árqashan maǵan qoldaý kórsetetin jandardyń árqaısysyn baǵalaımyn. Meniń 2017 jyly bir jasar balammen Los-Andjeleske kásibı modeldik qyzmetke barýyma sebepker bolǵan ózderińiz. Men osy tańǵajaıyp platformanyń qurylǵanyna jáne kópshiligińizdiń meniń barlyq isterimdi qoldaǵandaryńyz úshin óte rızamyn», - dep jazdy model Instagram paraqshasynda.
Krıstına 2022 jyly AQSh-ta ótken Miss Universe World International baıqaýynda bas júldeni jeńip alǵan. Qazaqstandyq model Chopard, Cartier, Michael Costello, Balmain, Yves Saint Laurent sııaqty álemdik brendtermen jumys istep te úlgerdi. Ol Vogue, Mexico, Elle, Glamour, Harper's Bazaar jýrnaldarynyń muqabalaryna shyqty.
