Qazaqstandyq avtorlar Bangkoktaǵy TikTok LIVE festıvalinde júlde aldy
ASTANA. KAZINFORM — Qazaqstandyq eki kreator Bangkokta ótken TikTok LIVE Community Fest 2026 festıvalinde úzdikter qatarynan kórindi. Olardyń biri festıvaldiń eń joǵary sanatyndaǵy marapatqa ıe bolsa, taǵy bir qazaqstandyq avtor Gold syılyǵyn aldy.
Taıland astanasynda ótken TikTok LIVE Community Fest 2026 Ońtústik-Shyǵys jáne Ortalyq Azııa elderinen 300-den astam tikeleı efır avtorynyń basyn qosty. Bıyl festıval «Be Part of the Win» (Jeńistiń bir bóligi bol) uranymen úshinshi ret uıymdastyryldy.
Festıval aıasyndaǵy TikTok LIVE Community Fest 2026 Awards marapattaý rásiminde Ońtústik-Shyǵys jáne Ortalyq Azııa elderiniń 30-dan astam kreatory shyǵarmashylyq jumysy, aýdıtorııamen baılanysy jáne belsendi qaýymdastyq qalyptastyrýǵa qosqan úlesi úshin marapattaldy.
Qazaqstandyq eki kreator marapat aldy
Bıylǵy festıvalde marapattar Legend, Platinum jáne Gold sanattary boıynsha tabystaldy. Qazaqstannan eki avtor negizgi sanattarda úzdikter qataryna endi.
Rýslan Nýrtazın (@omgdnss) eń joǵary Legend sanatynda marapattalǵan alty kreatordyń biri boldy. Avtordyń tikeleı efırleri ár eldegi kórermenderdi biriktirip, olardyń ózara aralasýyna jáne mádenı baılanys ornatýyna múmkindik beredi. Al Sabına (@pipikoldiko) Gold syılyǵyna ıe boldy. Ol tikeleı efırlerinde jazylýshylarymen erkin áńgimelesip, kórermenderdi dıalogqa tartady.
Qazaqstandyq avtorlardyń óńirlik festıvalde marapattalýy eldegi TikTok LIVE kreatorlarynyń halyqaralyq aýdıtorııaǵa shyǵa bastaǵanyn kórsetip otyr.
Qazaqstanda mýzykalyq tikeleı efırler tanymal
Qazaqstandyq TikTok LIVE avtorlary arasynda mýzykalyq baǵyttaǵy kreatorlar da kóbeıip keledi.
Solardyń biri — Sýhrab Kýrbanov (@suhrab_k). Ol tikeleı efırlerde án aıtyp, kórermenderimen erkin qarym-qatynas ornatady.
Al gıtarıst Ivan Jýkov (@mayduet) basqa mýzykanttarmen birlesip efır ótkizip, gıtarany skrıpka, vıolonchel jáne ózge de aspaptarmen úılestiredi.
Osylaısha qazaqstandyq kreatorlardyń aýdıtorııasy el aýmaǵymen shektelmeı, sheteldik kórermenderdi de qamtyp keledi.
Qazaqstannyń mýzeıleri de TikTok LIVE arqyly tanystyryldy
Bıyl Qazaqstan TikTok LIVE Comes Alive jahandyq baǵdarlamasyna qosyldy. Onyń aıasynda Qazaqstan Respýblıkasynyń Ulttyq mýzeıi men Almaty Museum of Arts halyqaralyq aýdıtorııaǵa tanystyryldy.
Museums Come Alive naýqany men #MuseumTok bastamasy aıasynda mýzeıler tikeleı efır arqyly mádenı mura, óner týyndylary men mýzeı qorlary týraly ınteraktıvti formatta aqparat usynýǵa múmkindik aldy.
Bul tájirıbe TikTok LIVE-tyń tek oıyn-saýyq nemese avtor men kórermen arasyndaǵy áńgime alańy emes, mádenı jáne tanymdyq kontentti halyqaralyq aýdıtorııaǵa jetkizýdiń bir quralyna aınalyp kele jatqanyn kórsetedi.
Tikeleı efır júrgizetin avtorlar sany 50%-dan astamǵa ósti
TikTok málimetinshe, 2026 jyldyń alǵashqy alty aıynda Ońtústik-Shyǵys jáne Ortalyq Azııada 95 mıllıonnan astam kreator tikeleı efır ótkizgen. Bul ótken jyldyń sáıkes kezeńimen salystyrǵanda 50%-dan astam joǵary.
Olardyń 40 mıllıonnan astamy TikTok LIVE-ta alǵash ret efırge shyqqan. Platforma deregine sáıkes, jańadan qosylǵan árbir úshinshi avtor alǵashqy 30 kún ishinde alǵashqy syıaqysyn alǵan.
TikTok LIVE-ta oıyn-saýyqpen qatar saıahat, tarıh, mádenıet jáne óner taqyrybyndaǵy efırler de damyp keledi. Máselen, Taılandta platforma eldiń Týrızm basqarmasymen birge Songkran merekesine arnalǵan tikeleı efırler uıymdastyrsa, Vetnamda Beauty Vietnam jobasy arqyly eldiń birneshe óńiriniń mádenıeti men dástúrleri tanystyrylǵan.
TikTok LIVE Community Fest 2026 qorytyndysy Qazaqstandaǵy tikeleı efır avtorlarynyń da osy óńirlik úrdistiń bir bóligine aınalyp, halyqaralyq deńgeıde tanyla bastaǵanyn kórsetti. Buǵan deıin Prezıdent Qasym-Jomart Toqaev smartfondy tek oıyn-saýyq quraly retinde emes, tabys tabý jáne kásip júrgizý úshin paıdalaný qajet ekenin aıtqan edi.
