Qazaqstandyq avıatasymaldaýshy Shyńjańdaǵy eń iri sheteldik áýekompanııa atandy
ASTANA. KAZINFORM — Búgin qazaqstandyq FlyArystan áýekompanııasy QHR Shyńjań – Uıǵyr avtonomııalyq aýdanyndaǵy eń iri sheteldik avıakompanııa atanyp, «Astana-Inın (Qulja)» baǵyty boıynsha alǵashqy reısti oryndady, dep habarlaıdy Kazinform agenttiginiń Beıjińdegi menshikti tilshisi.
Airbus A320 ushaǵymen FS 7989 reısi Astana halyqaralyq áýejaıynan saǵat 07:55-te ushty. Jol júrý ýaqyty 2 saǵat 25 mınýt boldy. Inınada bortty avıatsııalyq dástúr boıynsha sý arkasymen qarsy aldy.
Jańa áýe baǵyty boıynsha turaqty tikeleı reıster aptasyna úsh ret – dúısenbi, sársenbi jáne senbi kúnderi oryndalady. Bir jaqty bıletterdiń quny 34 390 teńgeden bastalady.
- Búginde qazaqstandyq avıakompanııa Qytaıdyń Shyńjań - Uıǵyr avtonomııalyq aýdanyndaǵy eń iri sheteldik tasymaldaýshyǵa aınaldy jáne biz muny maqtan tutamyz. Aımaqqa tikeleı reıster suranysqa ıe bola bastady. Olardy isker jolaýshylar, saýda kompanııalary jáne Shyńjańǵa alǵash barǵan týrıster tańdaıdy. Bir kezderi ol Uly Jibek jolynyń qıylysynda jatty, al búginde ol Qazaqstan men Qytaı arasyndaǵy saýda ortalyǵyna aınaldy. Biz onymen birge damýǵa jáne munda jańa baǵyttar ashýǵa nıettimiz, – dep atap ótti «FlyArystan» AQ prezıdenti Iohan Eıdhagen.
Áýekompanııa Almaty, Astana jáne Aqtaýdy Úrimshi jáne Inın qalalarymen baılanystyra otyryp, Qazaqstan men Shyńjań arasynda tórt tikeleı marshrýtty oryndaıdy.
Buǵan deıin Jańa avıamarshrýt Astanany qytaılyq Inınmen baılanystyratyny habarlanǵan bolatyn.
Aıta keteıik, Qazaqstan men Oman arasynda tikeleı áýe qatynasy ashyldy.
