Qazaqstandyq avıakompanııalar geosaıası jaǵdaıǵa baılanysty ushý kestesin qaıta qaraýda

ASTANA. KAZINFORM – Qazaqstannyń Azamattyq avıatsııa komıteti Irannyń Izraıl aýmaǵyndaǵy shabýylyna baılanysty qazaqstandyq áıe reısteri kestesinde ózgerister bolýy múmkin ekenin aıtýda. 

«Iran, Irak, Iordanııa, Lıvan, Izraıl, Mysyr jáne Sırııanyń kúrdeli saıası jaǵdaıyna baılanysty Qazaqstannyń avıatsııalyq ákimshiligi qazirgi ahýalǵa tóngen qater dárejesine baǵalaý júrgizdi. Onyń qorytyndysy boıynsha qazaqstandyq avıakompanııalarǵa osy elderdiń áýe keńistigin paıdalaný usynylmaıdy. Qazirgi ýaqytta qazaqstandyq avıakompanııalar joǵaryda atalǵan elderdiń áýe keńistigin aınalyp ótý maqsatynda reıster kestesin qaıta qaraýda. Kompanııalar jaǵdaıdy muqııat qadaǵalap otyr jáne qajet bolǵan jaǵdaıda óz kestelerine ózgerister engizedi», - dep habarlady komıtet.

Atap aıtqanda, Air Astana áýekompanııasynyń Astana-Dýbaı baǵyty boıynsha KS-205 jáne Almaty-Dýbaı baǵyty boıynsha KS-897 reısteri búgin Astana ýaqyty boıynsha saǵat 15.00-de ushady.

Qatar Airways áýekompanııasynyń 13 jáne 14 sáýirde oryndalýy josparlanǵan Doha-Almaty-Doha baǵyty boıynsha QR-389/390 QR-391/392 reısteri belgisiz ýaqytqa deıin shegerildi.

«Qazirgi ýaqytta avıakompanııa reısterdi oryndaý baǵytyn ózgertý máselesin qarastyrýda. Jolaýshylarǵa qoldanystaǵy zańnamada kózdelgen qyzmetter kórsetiledi. Jolaýshylar reıster mártebesin resmı saıttarda nemese avıakompanııalardyń baılanys ortalyqtary arqyly baqylaýy kerek. Jolaýshylardyń qaýipsizdigin qamtamasyz etý – azamattyq avıatsııa salasy úshin mańyzdy basymdyq», - deıdi komıtet.