Qazaqstanda ulttyq júk avıakompanııasy qurylýy múmkin — Úkimet
ASTANA. KAZINFORM – Premer-mınıstr Oljas Bektenov avıatsııa salasyn damytý máseleleri boıynsha jıyn ótkizdi. Bul týraly Úkimettiń baspasóz qyzmeti málim etti.
Prezıdenttiń Qazaqstannyń avıatsııalyq hab retindegi rólin kúsheıtý, atap aıtqanda, áýe toraptaryn damytý, jerústi ınfraqurylymyn jańǵyrtý jónindegi tapsyrmalaryn júzege asyrý barysy qaraldy. Ulttyq júk avıatasymaldaýshyny qurý máselesine erekshe nazar aýdaryldy.
Kólik mınıstrliginiń málimetinshe, 2025 jyldyń birinshi jartyjyldyǵynda qazaqstandyq avıakompanııalar 7,2 mln jolaýshy tasymaldaǵan, bul ótken jyldyń sáıkes kezeńimen salystyrǵanda 6%-ǵa artyq. Áýejaılarda jolaýshylarǵa qyzmet kórsetý kólemi 14,4 mln adamǵa deıin artty. Qazirgi ýaqytta ishki avıatasymaldar jalpy jıiligi aptasyna 849 reıs bolatyn 61 baǵdar boıynsha oryndalady.
Sońǵy jyldary Qazaqstanda 20 ushý-qoný jolaǵy, 19 termınal rekonstrýktsııalandy, Túrkistanda jańa áýejaı salyndy. Kólik mınıstri Nurlan Saýranbaev bıyl áýe kemeleri parkin 16 birlikke tolyqtyrý kútilip otyrǵanyn, onyń 6-ýy búginde satyp alynǵanyn baıandady. Jalpy, 2030 jyldyń sońyna deıin flot 221 birlikke deıin ulǵaıtylady. Sondaı-aq 2025 jyly 36 baǵdardy ashý jáne jańartý josparlanýda. Investıtsııalyq baǵdarlamalar sheńberinde avıatsııa salasyna barlyǵy shamamen $2,9 mlrd tartý kózdelip otyr. Qarajatty iri jobalardy júzege asyrýǵa, atap aıtqanda, Katonqaraǵaı, Zaısan, Kendirli, sondaı-aq Arqalyq týrıstik aımaqtarynda jańa áýejaılar salý, 10 ushý-qoný jolaǵy men 10 termınaldy rekonstrýktsııalaý, arnaıy tehnıka parkin jańartý jumystaryna jumsalmaq.
Jıynda sondaı-aq júk avıakompanııasyn qurý jónindegi bastamanyń iske asyrylý barysy qaraldy. Bul joba álemdik júk avıatasymaly naryǵynyń turaqty ósýine baılanysty qolǵa alynǵaly otyr. Búgingi tańda ondaǵy kólem 57,7 mln tonnany quraıdy, bul rette tasymaldardyń shamamen 15%-y Qazaqstannyń áýe keńistigi arqyly ótedi.
«Samuryq-Qazyna» UÁQ» AQ basqarma tóraǵasy Nurlan Jaqypov álemdik tájirıbege sáıkes bastapqy kezeńde úsh áýe kemesin jalǵa alyp, keıinnen flotty on birlikke deıin keńeıtý kózdelip otyrǵanyn baıandady. Ulttyq júk avıatasymaldaýshynyń operatorlyǵymen alǵashqy reısti iske qosý 2026 jyldyń basyna júzege aspaq. Joba ózin ózi aqtaýy úshin otynmen qamtamasyz etýdiń kepildendirilgen kólemi qarastyrylýda.
Premer-mınıstr júk avıatasymaldaýshyny qurý boıynsha barlyq daıyndyq protsesterin barynsha jedeldetýdi tapsyrdy.
— Prezıdent Qasym-Jomart Toqaev Qazaqstandy aımaqtaǵy jetekshi avıatsııalyq hab retinde kúsheıtý mindetin qoıdy. Qazirgi tańda áýejaı ınfraqurylymyn jáne ishki tasymaldardy damytý boıynsha keshendi jumystar júrgizýde. Sonyń ishinde júk avıatasymaldaýshyny qurý — negizgi jobalardyń biri. Ony júzege asyrý tranzıttik júk aǵyndaryn Qazaqstanǵa qaraı burýǵa múmkindik beredi jáne júk avıatasymaly naryǵyndaǵy bizdiń ustanymymyzdy kúsheıtedi, —dep atap ótti Oljas Bektenov.
Aıta keteıik, buǵan deıin Premer-mınıstr Oljas Bektenov Prezıdent Qasym-Jomart Toqaevtyń medıtsına qyzmetkerlerin qorǵaýdy kúsheıtý jáne densaýlyq saqtaý mekemelerindegi qaýipsizdikti arttyrý jónindegi tapsyrmalarynyń oryndalý barysy týraly jıyn ótkizgen bolatyn.