Qazaqstandyq aýyr atletter Azııa chempıonatynda 59 medal jeńip aldy
ASTANA. KAZINFORM — Qazaqstandyq aýyr atletter Tashkenttegi Azııa chempıonatyndaǵy ónerin aıaqtady, dep habarlaıdy Aýyr atletıka federatsııasynyń baspasóz qyzmeti.
Tashkentte (Ózbekstan) jasóspirimder men qyzdar, jastar men jasóspirimder arasyndaǵy aýyr atletıkadan Azııa chempıonaty aıaqtaldy. Jarys 2026 jylǵy 7-14 tamyz aralyǵynda ótti. Qazaqstan quramasy sapynda 28 sportshy óner kórsetti.
Jarys qorytyndysy boıynsha qazaqstandyq aýyr atletter julqa kóterý, serpe kóterý jáne qossaıys nátıjesi boıynsha jalpy 59 medal jeńip aldy. Onyń 19-y — altyn medal. Qurama óneriniń basty nátıjeleriniń biri — qazaqstandyq sportshylardyń Azııanyń 11 jáne álemniń 5 rekordyn jańartýy.
Jalpy komandalyq esepte Qazaqstan quramasy 17 jasqa deıingi qyzdar arasynda jáne 20 jasqa deıingi jasóspirimder arasynda barlyq qatysýshy elder arasynda birinshi oryn aldy.
Quramanyń eń nátıjeli óner kórsetken sportshylarynyń biri — Snejana Qashkarova. 57 kelige deıingi salmaq dárejesinde ol 17 jasqa deıingi qyzdar arasynda Azııa chempıonatynyń úsh altyn medalin jeńip aldy. Sportshy julqa kóterýde 88 keli, serpe kóterýde 112 keli kóterip, qossaıysta 200 keli nátıje kórsetti.
20 jasqa deıingi jasóspirimder arasyndaǵy Azııa chempıonatynda Snejana Qashkarova julqa kóterýde 88 keli nátıjemen kúmis, serpe kóterýde 112 keli jáne qossaıysta 200 keli nátıjemen altyn medal ıelendi. Jarys barysynda ol Azııanyń úsh jáne álemniń úsh rekordyn jańartty.
Sondaı-aq Snejana aýyr atletıkadan «Azııanyń úzdik sportshysy» atalymynyń jeńimpazy atandy.
Jeke marapat qazaqstandyq aýyr atletshiniń týrnırdegi nátıjelerin tolyqtyryp, onyń Azııa deńgeıindegi sporttyq jetistikteriniń taǵy bir moıyndalýyna aınaldy.
Aıanat Jumaǵalı 20 jasqa deıingi jasóspirimder arasyndaǵy Azııa chempıonatynda úsh altyn medal jeńip aldy. 77 kelige deıingi salmaqta ol julqa kóterýde 104 keli, serpe kóterýde 133 keli jáne qossaıysta 237 keli nátıjemen birinshi oryn aldy.
Nurjan Jumabaı 95 kelige deıingi salmaqta 17 jasqa deıingi jasóspirimder arasyndaǵy Azııa chempıonatynda eki altyn jáne bir kúmis medal ıelendi. Sportshy julqa kóterýde 159 keli jáne qossaıysta 354 keli nátıjemen birinshi oryn aldy. Serpe kóterýde 195 keli kóterip, kúmis medal jeńip aldy. Jarys barysynda ol Azııanyń úsh rekordyn jańartty. 20 jasqa deıingi jasóspirimder arasyndaǵy Azııa chempıonatynda Nurjan Jumabaı julqa kóterýde 159 keli nátıjemen qola medalǵa ıe boldy.
Aqjol Qurmanbek 85 kelige deıingi salmaqta 20 jasqa deıingi jasóspirimder arasyndaǵy Azııa chempıonatynda eki altyn jáne bir kúmis medal jeńip aldy. Sportshy julqa kóterýde 160 keli nátıjemen ekinshi oryn aldy. Serpe kóterýde 198 keli, qossaıysta 358 keli nátıjemen altyn medal ıelendi. Ol jarys barysynda Azııanyń eki rekordyn jańartty.
Ksenııa Prozorova 61 kelige deıingi salmaqta 17 jasqa deıingi qyzdar arasyndaǵy Azııa chempıonatynda eki altyn jáne bir kúmis medal jeńip aldy. Sportshy julqa kóterýde 94 keli jáne qossaıysta 204 keli nátıjemen birinshi oryn aldy. Serpe kóterýde 110 keli kóterip, ekinshi orynǵa ıe boldy. Onyń enshisinde Azııanyń eki jáne álemniń eki rekordy bar.
Beıbarys Erseıt qurama qorjynyna taǵy eki altyn medal saldy. 65 kelige deıingi salmaqta 17 jasqa deıingi jasóspirimder arasyndaǵy Azııa chempıonatynda ol julqa kóterýde 129 keli jáne qossaıysta 281 keli nátıjemen birinshi oryn aldy. Serpe kóterýde sportshy 152 keli kóterip, kúmis medal jeńip aldy. Jarys barysynda Beıbarys Erseıt Azııa rekordyn da jańartty.
Sondaı-aq Qazaqstan quramasynyń qorjynyna myna sportshylar medal saldy:
- Asanhan Tórehan — Azııa chempıonatynyń kúmis júldegeri;
- Áskerbaı Álıhan — qola medal;
- Sofııa Sheshýkova — 17 jasqa deıingi qyzdar arasyndaǵy Azııa chempıonatynyń qola jáne 20 jasqa deıingi qyzdar arasyndaǵy Azııa chempıonatynyń kúmis medali;
- Berikbol Nursyıla — qola medal;
- Ermakova Margarıta — qola medal;
- Danılova Kıra — kúmis medal;
- Sáýlebekov Erasyl — qola medal;
- Arapbaı Nurasyl — kúmis medal;
- Tursynbekov Ersultan — qola medal;
- Omar Ramazan — qola medal;
- Arapbaı Janasyl — qola medal;
- Janbolat Aıǵanym — qola medal.
Tashkenttegi jarys aıasynda Ortalyq Azııa chempıonaty da ótti. Onda qazaqstandyq aýyr atletter túrli dárejedegi medaldarǵa ıe boldy.
- Insana Rashıdova — altyn medal;
- Qoıshybek Muhammedáli — qola medal;
- Vıktorııa Mýrashkına — kúmis medal;
- Omar Ramazan — qola medal.
Osylaısha, Qazaqstannyń aýyr atletıka quramasy Azııa chempıonatyndaǵy jarysty joǵary nátıjelermen aıaqtap, Azııa jáne álem rekordtaryn jańartty. Sondaı-aq 17 jasqa deıingi qyzdar jáne 20 jasqa deıingi jasóspirimder arasynda jalpy komandalyq esepte birinshi oryn aldy.
