Qazaqstandyq aýyl sharýashylyǵy ónimderin Qytaıǵa eksporttaý kólemi artýy múmkin
ASTANA. KAZINFORM — QHR-da QR Aýyl sharýashylyǵy vıtse-mınıstri Ermek Kenjehanuly Qytaı Halyq Respýblıkasynyń bas keden basqarmasy basshysynyń orynbasary Van Lıntszıýnmen kezdesti. Bul týraly AShM baspasóz qyzmeti habarlady.
Kelissózderdiń negizgi taqyryby fıtosanıtarııalyq jáne veterınarııalyq qaýipsizdik salasyndaǵy yntymaqtastyqty keńeıtý, sondaı-aq qazaqstandyq agrarlyq ónimniń Qytaı naryǵyna eksport kólemin arttyrý sharalaryn talqylaý boldy.
Kelissózder barysynda taraptar fıtosanıtarııalyq baqylaý jónindegi ulttyq talaptar men rásimder týraly aqparat almasty, karantındik ónimdi tasymaldaý kezinde ózara is-qımyldy ońtaılandyrý joldaryn qarastyrdy.
Dıalogtyń negizgi taqyryptarynyń biri — qant qyzylshasynyń jomyn óndiretin qazaqstandyq kásiporyndardy birlesip tekserýdi uıymdastyrý, jańa óńirlerdi qosý arqyly QHR-na bıdaı men arpany eksporttaý geografııasyn keńeıtý, sondaı-aq Qytaı naryǵyn jańa ósimdik sharýashylyǵy ónimderi — kúrish, maqta, qaýyn jáne qarbyz úshin ashý boldy.
— Mal sharýashylyǵy ónimin Qytaıǵa eksporttaýdy keńeıtý máselesine erekshe nazar aýdaryldy. Tamyz aıynyń sońynda qazaqstandyq qus fabrıkalaryna QHR ınspektsııalyq tobynyń tekserýi bastalady dep kútilip otyr.
Sondaı-aq sıyr terileri, qus eti men soıys malyna arnalǵan veterınarııalyq sertıfıkattardy jedel kelisýdi qosa alǵanda, salqyndatylǵan jáne termııalyq óńdelgen ónimderdi qamtıtyn sıyr eti, qoı eti jáne shoshqa eti eksportyna qatysty veterınarııalyq hattamalardy ózektendirý máseleleri qaraldy, — delingen habarlamada.
Taraptar fıtosanıtarııalyq jáne veterınarııalyq baqylaýdyń tıimdiligin arttyrýǵa, ekijaqty saýda rásimderin jedeldetýge baǵyttalǵan saraptamalyq dıalogty damytý men yntymaqtastyqty tereńdetýge ózara múddelilik bildirdi.
Inspektsııalardy ótkizý jáne tıisti qujattarǵa qol qoıý Qazaqstan men Qytaı arasyndaǵy saýda-ekonomıkalyq baılanystardy damytýda, sondaı-aq Qytaı naryǵyna sapaly ári qaýipsiz ónimniń turaqty jetkizilimin qamtamasyz etýde mańyzdy qadam bolmaq.
Aıta ketelik fermerlerdi qarjylaı qoldaý kúsheıedi: kredıtter men lızıngti sýbsıdııalaý qaǵıdasy ózgerdi.